Dapi blers onns resuna il tun da partenza per la nova stagiun da skis a Sölden, sin il glatscher da «Rettenbach». Ils skiunz e las skiunzas svizras han bunas regurdientschas vi da las cursas a Sölden. Tar las dunnas tegna Lara Gut-Behrami, ensemen cun Tina Maze, il record da trais victorias. Tar ils umens ha Marco Odermatt gudagnà, a l’entschatta da la nova stagiun, gia duas giadas a Sölden.
Vanessa Kasper turna cun nov schlantsch
In return ad in lieu enconuschent è la partenza en la nova stagiun da skis a Sölden era per Vanessa Kasper. L’onn 2021 è ella stada per l’emprima e davosa giada a la partenza dal slalom gigant da Sölden – lura dentant senza ch’ella avess pudì far il pass en la segunda cursa.
Per la skiunza da Schlarigna è la partenza da quest onn ina nova partenza suenter ch’ella n'era betg pli part d'in cader da Swiss Ski. La stagiun passada ha ella stuì s'organisar sezza. Malgrà questas circumstanzas difficilas ha Vanessa Kasper mussà, tut senza cader, ina da sias meglras stagiuns da skis. En la cuppa d’Europa è ella ida trais giadas sin il podest. Grazia a questas bunas prestaziuns ha ella puspè pudì turnar en il cader B da Swiss Ski ed è sa qualifitgada per tut las 10 cursas da slalom gigant da la nova stagiun.
Thomas Tumler suenter la meglra stagiun insumma anc ina meglra
Cun la vegliadetgna madira da 35 onns ha Thomas Tumler da Samignun mussà sias meglras prestaziun. A Beaver Creek, en ils Stadis Unids, ha el gudagnà la stagiun passada sia emprima cursa da la cuppa mundiala. Il favrer è el lura daventà vice champiun mundial dal slalom gigant a Saalbach Hinterglemm. Suenter ina buna stad vul il skiunz ussa puspè dar gas sin las pistas.
A Sölden survegn Thomas Tumler sia emprima schanza da la stagiun – d'ina stagiun cun in enorm punct culminant il favrer. En l'Italia dal Nord èn ils Gieus Olimpics da Cortina – Milaun. Per mintga sportista e sportist è quai il pli grond insumma durant ina carriera.
