Pass per pass enavant. Uschia è la carriera dal skiunz grischun Stefan Rogentin sa sviluppada durant ils ultims onns. Ils skiunz da Lai è vegnì adina pli ferm, el ha pudì mussar adina megliers resultats. Avant duas stagiuns aveva Stefan Rogentin terminà il classament general en la disciplina super-G sco quart. Marco Odermatt aveva lura gudagnà la culla da cristal en la disciplina super-G. L’enviern 2023/2024 ha Stefan Rogentin era pudì gudagnar ses emprim super-G da la cuppa mundiala.
La stagiun passada alura ha il skiunz da Lai pudì festivar la segunda plazza en il classament general dal super-G e gudagnar sia emprima medaglia tar in campiunadi mundial. Uss vul il skiunz da 28 onns far il proxim pass. Rogentin ha surtut persvadì cun sia constanza. Durant tut las set cursas da super-G da la stagiun passada era el rangà il pli flaivel sin plazza set. Duas giadas ha el fatg il sigl sin il podest sin plazza trais.
Part dad ina ferma equipa
Las disciplinas spertas èn enta maun dals skiunzs svizzers. En la cursa aval ha il team da Swiss Ski festivà la stagiun passada in success cumplain. Marco Odermatt, Franjo Von Allmen ed Alexis Monney eran sin il podest dal classament general da la cursa aval. Ed en la disciplina super-G ha Marco Odermatt gudagnà la concurrenza, avant il grischun Stefan Rogentin.
