Suenter la victoria il 2022 ed il segund plaz il 2021 vegn Nadine Fähndrich quest onn terza en il sprint da la cuppa mundiala a Tavau. Il grond trumf svizzer aveva gia persvadì en il prolog cun il 5avel meglier temp. En il final cun las meglras sis èn la finala sulet la gronda favurita la Svedaisa Jonna Sundling e la Norvegiaisa Mathilde Myhrvold stadas pli spertas.
Cuntenta cun il sprint a la cursa da Tavau Nordic dastga er esser Anja Weber ch’ha cuntanschì il mezfinal. Lea Fischer ed Alina Meier da Tavau èn crudadas ora en il quartfinal. Per Fabienne Alder da Puntraschigna sco era per Désirée Steiner da Tavau è la cursa stada a fin gia suenter il prolog. Omaduas han manchentà la qualificaziun per ils finals cun las meglras 30.
Nagins Svizzers en il final
Tar ils umens ha Janik Riebli procurà per il meglier resultat. El ha cuntanschì sco sulet il mezfinal ed è la finala stà classà sco 9avel. Ina buna prestaziun ha era mussà Roman Alder da Puntraschigna, quai cunzunt en il prolog cun il 11avel meglier temp.
En il quartfinal è l’Engiadinais lura crudà ora. Ils dus frars Isai Näff e Noe Näff da Sent èn crudads ora gia suenter il prolog. Durant che Isai ha manchentà be per pauc la qualificaziun per ils finals cun ils megliers 30, ha Noe stuì sutterrar quest siemi gia baud suenter ch’el è crudà en venter en ina storta.
Chanavat gudogna – Klaebo out en il quartfinal
Gudagnà il sprint dals umens ha il Franzos Lucas Chanavat, avant il Talian Federico Pellegrino ed il Norvegiais Oskar Opstad Vike. Il grond favurit e dominatur en questa scena, il Norvegiais Johannes Hoesflot Klaebo, è crudà ora gia en il quartfinal – ina sensaziun. Klaebo ha gudagnà fin oz tschintg giadas il sprint a Tavau Nordic.