Advent - Il nanin da Nadal

Il temp d'advent è qua e l'atmosfera avant la pitschna chasa dal nanin da Nadal è magica. Segir spetgan ils uffants gia il nanin da Nadal. Ma tgi è quel nanin? Ins enconuscha il nanin da Nadal vi da ses corp cotschen ed ina chapitscha gizza sin il chau. N'avais vus anc nagin nanin da Nadal? En quest artitgel chattas ti 24 tips per supraisas e lumparias dal nanin da Nadal sco era duas instrucziuns da zambregiar.

Il nanin fa spezialmain magic e bel il temp da Nadal.

Davent dal 1. da december enfin Nadal procura il nanin da Nadal mintga di per ina surpraisa. El vul ch’ils uffants levian mintga damaun cun in surrir en fatscha. Forsa ha el zuppà lur stgalfins, laschà in regal sut il pignol da Nadal u scrit in messadi per ils uffants.

1 / 1

Legenda: RTR

24 ideas per las surpraisas dal nanin da Nadal

1. Il nanin da Nadal ha fatg la notg in um da naiv e plazzà quel davant l’isch-chasa.
2. Per ch'il nanin da Nadal possia dar vinavant al bambin ils giavischs da Nadal dals uffants, duain els scriver ina glista da giavischs. El ha mess tut quai ch'i dovra per far quai davant l’isch-chasa. Nus avain fatg in muster per la glista da giavischs dals uffants.
3. Il nanin da Nadal vul ch'ils uffants vegnian a savair dapli sur dad el. Perquai ha el zuppà en la stanza d'uffants in’istorgia ch’ins po preleger la saira.
4. El ha fatg pastizarias durant la notg. Per ils uffants ha el preparà pasta da biscuits, per ch’els possian era far pastizarias. Intgins recepts chattais vus qua.
5. Il nanin da Nadal ha fitg gugent fritgs. El supplitgescha ils uffants da ponderar tge fritgs ch’i dat l’enviern. Perquai ch'el ha il pli gugent maila, duain ils uffants dissegnar in mail per el. L'autra damaun è il dissegn barattà cun in mail.
6. Sco engraziament per ils bels dissegns ha il nanin da Nadal laschà enavos ina socca ch'el emplenescha cun nuschs e fritgs.
7. Il nanin da Nadal ha puspè fatg ina stucca. El ha zuppà la rauba da l’ensolver. Fastizs da crosas da nuschs mainan però ad ina cuppetta cun granola. Cun quest recept pos ti far tia atgna granola.
8. Il nanin da Nadal è sa lubì da far ina stucca ed ha striunà en la chombra d'uffants – la damaun chattan ils uffants fastizs en furma da pulvra da traglischim sin lur plimatsch.
9. Il nanin da Nadal supplitgescha ils uffants da dissegnar per el in maletg da Nadal. Il material da dissegnar ha el zuppà ed ils uffants ston l’emprim tschertgar il material. In dissegn da colurar va natiralmain era. Qua chatt'ins intgins dissegns da colurar.
10. Ils uffants duain envidar la saira ina glisch da notg per il nanin da Nadal, uschia ch'el po tschiffar la glisch. L'autra damaun ha el transfurmà la glisch en ina chadaina da glischs e decorà cun quella lur chombra.
11. Per ses proxim striegn supplitgescha il nanin da Nadal ils uffants da metter a disposiziun ad el in cuppin latg. L'autra damaun ha el transfurmà il latg en in cacau. Il recept per far tes agen cacau chattas ti qua.
12. Il nanin da Nadal ha zuppà sur notg ils termagls dals uffants. Els ston tschertgar els. Per sa perstgisar ha el fermà vi dals termagls ina pitschna tschigulatta.
13. Il nanin da Nadal ha prendì las furmas da biscuits da Nadal: oz han ils paunins da pausa furmas tut spezialas.
14. Il nanin da Nadal supplitgescha ils uffants da far ina decoraziun da Nadal. El ha preparà chaussas per zambregiar ina staila da Nadal. L'instrucziun chattais vus qua.
15. Il nanin da Nadal ha engulà in biscuit da Nadal. Las mieulas davant l'isch-chombra cumprovan ch'el ha laschà gustar.
16. Sco engraziament per ils biscuits ha il nanin da Nadal mess en ils chalzers dals uffants in pèr mandarinas.
17. Il nanin da Nadal stgarpitscha adina sur ils termagls dals uffants. Perquai supplitgescha el ils uffants da far urden. Per engraziar dastgan ils uffants guardar questa saira il Minisguard.
18. La notg ha il nanin da Nadal giugà in zic cun la naiv – e repartì in pau naiv artifiziala sin maisa.
19. Il nanin da Nadal ha pendì decoraziuns da Nadal vi dal barschun da dents per far legher. Levas ti far tia atgna decoraziun da Nadal? Qua chattas ti in'instrucziun per in tschierv da nuschs.
20. Il nanin da Nadal ha purtà oranschas e  scorsas-chanella e tut las ingredienzas per far sirup da vaniglia-oranscha. El vul era sagiar. Sch’ils uffants mettan la saira ina cuppetta cun sirup davant l’isch-chombra, è quella vida il proxim di. Cun quest recept pos ti far tes agen sirup.
21. Cura ch'ils uffants levan, èsi temp da durmir per il  nanin da Nadal. El supplitgescha da chantar per el ina chanzun da durmir avant ses isch. Il pli gugent ha el chanzuns da Nadal. Qua chattas ti ina proposta.
22. Prest èsi Nadal ed il nanin da Nadal sto turnar tar il bambin. Per ch'el na stoppia betg laschar encrescher memia fitg per ils uffants, als supplitgescha el da dissegnar in purtret. Uschia po el sa regurdar dals uffants.
23. Il nanin da Nadal ha mess il svegliarin per ils uffants. Cura ch’igl è temp da levar, cumenza ad ir ina bella chanzun da Nadal sin Radio RTR.
24. Ha l’entira famiglia fatg pulit? Mintgina e mintgin duess numnar trais chaussas ch'ella u ch’el ha fatg spezialmain bain quest onn. Sco engraziament ha il nanin da Nadal pendì si in pèr dultscharias vi dal pignol da Nadal.