Il schurnalissem local stat sut squitsch ed adina dapli infurmaziuns vegnan consumadas online. Precis perquai èsi tenor la FHGR impurtant da chattar novas vias per far visibels temas or da las vischnancas champestras. En il rom dal project cun il num «Lokalreporter» han scolaras e scolars gì la pussaivladad da vegnir sezs activs sco reporters e reportras che raquintan istorgias e preschentan lur conturns da viver.
Ils giuvenils han survegnì durant plirs blocs d’insctucziun la savida necessaria per realisar contribuziuns da video. Saja quai tecnic, en furma da preparaziuns per in'intervista u era cun sustegn da raquintar istorgias a moda attractiva ed adattada.
La finamira è stada, da mussar co las scolaras ed ils scolars vesan lur regiun, tge che muventa els ed ellas e tgi che merita attenziun. Las contribuziuns dattan uschia in’invista persunala ed autentica en la vita locala.
Ils videos da la Val Lumnezia
RTR ha accumpagnà ils participants surtut en la part dal storytelling: da l’idea sur il storyboard fin a la preparaziun a la filmada. Uschia han ils giuvens e las giuvnas emprendì co structurar ina istorgia, co sa preparar avant ina filmada e co metter en scena las persunas e las istorgias a moda clera e chapibla.
In grond cumpliment a tuts e tuttas per lur lavur — lur istorgias meritan da vegnir vesidas.
Ils resultats mussan cleramain il potenzial da la giuvna generaziun en connex cun camera e microfon. Cun engaschi, creativitad e grond interess han las scolaras ed ils scolars creà contribuziuns che fan visibels temas locals e persunas or da lur regiuns.
Ils videos da Grüsch
En il futur èn er planisads uschenumnads curs da generaziuns. Là duain las persunas giuvnas dar vinavant lur savida a persunas pli veglias e mussar ad ellas co producir e preparar talas contribuziuns. Uschia duai il barat tranter las generaziuns vegnir promovi.
Il project vegn accumpagnà scientificamain da la FHGR che examinescha sch'in tal model da furmaziun po contribuir a rinforzar il schurnalissem local a lunga vista e render el pli persistent.
Duvrais in'idea per ina lecziun che tracta las medias? Vulais visitar RTR ed emprender co far videos u identifitgar «fake-news»? U duai RTR vegnir tar vus e far in'emissiun ord scola?
Sut rtr.ch/uffants/scola chattais Vus tut las infurmaziuns.