Tar mintga matsch a chasa da l'EHC Cuira èsi pussaivel da cumbinar l'interess da sport cun plaschairs culinarics. Quella purschida è part dal concept da gastro che daventa adina pli impurtant en il stadion a Cuira, manegia il president da l'EHC Carmine Di Nardo. E dapi questa stagiun tutga pia era la nova spezialitat unica, il fondue da l'EHC, tar questa purschida.
Il fondue tutga era tar l'eveniment da matsch e gida da far vegnir pli enconuschent l'EHC Cuira.
Per celebrar la creaziun hai per l'emprima giada en l'istorgia dal club dà in festival da fondue en il stadion a Cuira. Ils fans han pudì eleger tranter las duas variantas da fondue da l'EHC: in fondue cun ina maschaida classica u ina varianta pli picanta.
En stadions dal hockey sin glatsch en il Vallais saja quai gia in mument tradiziun da porscher fondue. Quai haja inspirà l'EHC da medemamain integrar in'atgna versiun en la purschida culinarica. Il fondue haja er ina plivalur per il club sco product supplementar da porscher e vender als fans, declera Carmine Di Nardo.