Vacanzas passenta el gugent en las terras dal nord da l'Europa. El na supportia betg temperaturas da passa 24 grads. Quai lascha chapir meglier che Donat Albin passenta ses temp liber durant l'enviern il pli gugent sin il glatsch da Trun, nua ch'el è creschì si.
«Mes bab è anc oz ina persuna d'identificaziun per l'Uniun da scursalet Trun», di Donat Albin. Ses bab Silvio Albin haja dà vinavant la passiun per il hockey sin glatsch, ma era la schientscha ed il spiert per las uniuns.
Ina vita sin il glatsch da Trun
-
Bild 1 von 4. Cun set onns gia goli dals juniors. Oz ha Donat Albin 43 onns. El guarda enavos sin 24 onns sco goli tar l'Uniun da Scursalets Trun e dapi blers onns è el attatgader e defensur. Bildquelle: Silvio Albin.
-
Bild 2 von 4. Scadin bun goli sto laschar mitschar in puck en la rait. Donat Albin, cura che el aveva circa nov onns, sin la patinera natirala a Trun. Bildquelle: Silvio Albin.
-
Bild 3 von 4. Jau porta cun superbia il «hoody» da l'Uniun da scursalets. Donat Albin ha cumenzà sco uffant a dar hockey. Oz fa el part dals «rutinads». 24 onns è el stà goli, uss è el defensur e attatgader da la Uniun da Scursalets Trun. Bildquelle: UST.
-
Bild 4 von 4. Donat Albin è cussegliader da facultad da professiun. Donat Albin: «Jau hai adina plaschair da pudair cussegliar e gidar mia clientella. Dal uffant enfin il senior u la seniora. Bildquelle: RTR.
Hockey sin glatsch u ballape? «Cleramain hockey sin glatsch, damai ch'jau sun president da l'Uniun da scursalets da Trun», di Donat Albin cun persvasiun. En omadus sports è Donat Albin stà activ gia da pitschen ensi. Cun prest 44 onns è el persvas che sport ed esser part dad in'uniun dal vitg è ina part essenziala per l'educaziun, sco era per las cumpetenzas socialas d'in uffant.
Sport è in'excellenta scola per l'uffant. Disciplina e spiert d'unitad en valurs fundamentalas per la vita.
Dapi passa 60 onns tgira l'Uniun da scursalets Trun la patinera natirala a Pustget. Las lunas dal temp, ma era la midada dal clima fan quitads al president da l'uniun: «Ina patinera natirala è bain colliada ad ina tscherta nostalgia, ma il temp da concretisar plans per ina patinera artifiziala na pon betg pli spetgar 10 onns».
Donat Albin constatescha in'euforia veritabla tar il hockey sin glatsch. Cun duas squadras da creschids e prest 40 junioras e juniors vesa el bun potenzial per l'avegnir da la patinera a Trun e per l'Uniun da scursalets a Trun.
Igl è uras da tschaffar curaschi e patratgar pli grond.
Sco grond fan dal hockey sin glatsch cumbineschia el savens vacanzas cun concerts, cultura e sport. L'onn 2009 haja Donat Albin visità cun amis in gieu da hockey a New York en il stadion «Madison Square Garden», 2016 a Nashville tar gieus da hockey da la «NHL» americana. Experientschas unicas, di el: «En ils Stadis Unids èn gieus da hockey ina gronda show, i vegn mangià fitg bler, e laschà enavos fitg bler mangiativas, ma jau hai chattà fitg interessant ils gieus».
La stad sin il pastget
In grond capitel en la vita sportiva da Donat Albin è il ballape. Actualmain dat el cun ils seniors dal CB Trun Rabius e giauda la cumpagnia a collegialitad senza grondas ambiziuns sportivas. Insaquants onns è el stà trenader da las squadras da terza e tschintgavla liga. Tge tip da trenader è el? «Jau sun il tip dal dialog, e betg il tip d'auzar la vusch», di Donat Albin. Be ina giada haja el auzà la vusch en la gardaroba durant la pausa, lezza giada haja quai purtà fritg.
Gidar e cussegliar las persunas è quai che ma stat il pli ferm a cor.
Da professiun è Donat Albin cussegliader da facultad tar la Banca Raiffeisen Cadi. Er en sia professiun mussa l'um da finanzas ina vaira constanza. Ils davos 25 onns ha el fatg la scola da commerzi e lavurà tar la banca Raiffaisen cun excepziun d'in curt interval. Digitalisaziun è in factur che fatschentia l'um da finanzas di per di: «Jau hai plaschair da vesair che senioras e seniors fan diever da las purschidas digitalas per l'administraziun da lur contos».
Tge cussegls che Donat Albin dat a persunas giuvnas puncto finanzas, pertge ch'el ha tatuà gist Freddie Mercury sin ses ventrigl e tge che chaschuna larmas en ses egls – quai e bler auter ans tradescha Donat Albin en l'emissiun «Profil».