En Svizra consumescha quasi mintga segunda persuna mo darar u naginas novitads. Quai mussa almain in studi actual dal fög, il Center da retschertga per la publicitad e la societad da l’Universitad da Turitg.
Cun l’experta da medias e perscrutadra da communicaziun, Johanna Burger dat la Marella in sguard sin quest ed auters svilups en il mund da las medias, declera tge ch’els muntan per la societad e la democrazia ed ella sclerescha er la dumonda sco ch’igl è tuttina pussaivel da mantegnair l’access ad infurmaziuns fidablas.
Tgi evitescha novitads – e pertge?
Cuntrari ad in pregiudizi derasà n’èn betg surtut persunas giuvnas quellas che volvan il pli savens il dies a novitads. Mabain surtut persunas tranter 35 e 54 onns – damai persunas en il mez da la vita cun lavur – famiglia ed obligaziuns. E dunnas sajan pertutgadas pli savens che umens.
L'experta da medias e perscrutadra da communicaziun, Johanna Burger, che lavura a la Scola auta spezialisada dal Grischun ed a la Libra Universitad da Berlin, di che quai possia star en connex cun la lavur da tgira, e ch'i manchia lura la fin dal di simplamain l’energia dad er anc s’infurmar, cunzunt sche quai che capita en il mund n’è betg propi legraivel. E novitads sappian er esser pesantas. Bleras persunas sa retiran perquai conscientamain e vesan novitads mo casualmain per exempel en las medias socialas.
«Algoritmus e bubbles»
Medias socialas pon rinforzar questa tendenza d'evitar novitads. Algoritmus decidan tge cuntegns che persunas vesan e tgenins betg. Tgi che ignorescha novitads, survegn anc pli paucas en l’avegnir.
Uschia vegn la «bubble» d’infurmaziun adina pli stretga. Contact casual cun novitads schurnalisticas daventa pli rar. Quai renda impurtant da tschertgar activamain novitads e betg sa fidar mo dals feeds automatics.
Consequenzas per la democrazia e societad
Sche adina dapli persunas eviteschan novitads, ha quai er consequenzas per la democrazia. Ina societad dovra persunas infurmadas. Perscrutaziuns mussan che persunas che consumeschan paucas novitads sa participeschan er pli pauc a votaziuns ed elecziuns. Quai maina a novas dumondas, per exempel:
Sch’ins pudess persvader las persunas che eviteschan novitads dad ir ad eleger e votar – sin basa da tge fan ellas quai?
E tuttina na vul quai betg dir che persunas cun pauc consum da novitads èn automaticamain pli influenzablas. Il studi menziunà dal fög mussa per exempel ch'ellas tendeschian savens al center politic. E ch’ellas refuseschan politichers autoritars sco per exempel in Donald Trump pli fitg che la gruppa da persunas che ha tenor studi il pli grond consum da medias.
Tge dovri ussa?
Medias tschertgan novas vias per cuntanscher il public – cun novs formats, novas plattafurmas e novas modas da raquintar. Il medem mument daventa cumpetenza da medias adina pli impurtanta per la societad: savair valitar funtaunas, savair metter a lieu infurmaziuns e decider conscientamain tge cuntegns ch’èn fidabels.