La disgrazia da fieu a Crans-Montana ha stgadanà. Dalunsch sur ils cunfins dal Vallais e da la Svizra or ha ella chattà resun en tut il mund – ina tragedia. Umans morts e blessads, cordoli e ravgia, snuizi e dumondas.
Igl è ina situaziun d’urgenza cumpletta e cumplexa er per tgi che ha da rapportar dad ella, raquinta Flavio Bundi, il schefredactur da RTR:
Nus avain adina ina rolla dubla: Infurmar e render public ils fatgs e da l’auter maun far quai cun responsabladad envers persunas ed instituziuns.
In equiliber delicat tranter rapportar e respectar
Igl è delicat: D'ina vart sto vegnir protegida la sfera privata e la dignitad da l'esser uman, surtut en situaziuns sensiblas. Da l'autra vart èsi l'incumbensa dal schurnalissem d'infurmar la publicitad davart eveniments relevants, per che quella possia furmar in'opiniun independenta e per promover la transparenza.
Da sias schurnalistas e ses schurnalists pretendia el lavur vardaivla e premurusa ed er l'abilitad e la prontadad da betg emetter insatge en cas da dubis.
L'etica è qua betg mo ina aschunta, ma atgnamain nossa cundiziun da basa.
Ina «bibla» per s'orientar en il caos
Gist en talas situaziuns pretensiusas dattan las directivas publicisticas da RTR segirezza, raquinta Flavio Bundi. Ellas respundian per exempel a dumondas sco: «Tge dretgs avain nus e sin tge èsi da dar adatg spezialmain?» u «co giain nus enturn cun nums?».
Nus numnain ellas adina nossa bibla e nos mussavia che gida.
Uschia defineschan las directivas ils dretgs ed ils limits da la publicitad e gidan a prender decisiuns cleras e chapiblas. Betg exnum sco reglament, suttastritga Flavio Bundi, mabain er sco basa per in agir prudent ed exact che pussibiliteschia ina autoreflexiun permanenta en il team.
La sfida da la sveltezza
Ina giada dapli mussan er il fieu da Crans-Montana las sfidas dal temp digital. Sche mintgin e mintgina po daventar in emettur tras medias socialas ed ils agens smartphones, vegn la lavur schurnalistica anc pli cumplexa.
La sveltezza da la derasaziun d'infurmaziuns e las emoziuns giogan ina rolla centrala, ma Bundi avertescha da betg sacrifitgar la professiunalitad per questas. El accentuescha l'impurtanza da verifitgar fatgs, da dar perspectivas e da porscher infurmaziuns cun in'autra plivalur per la publicitad:
Nossa incumbensa sco chasa da medias publica è da dar respostas sin las dumondas centralas: pertge, co, cura, nua e tgi? Al medem mument èsi er da guardar nà criticamain ed accumpagnar schurnalisticamain la lavur da las autoritads per stgaffir uschia transparenza e contribuir a la debatta publica.
Cunter il diluvi d'infurmaziuns nunverifitgadas e savens emoziunalas, ch'èn derasadas sin las medias socialas, stoppia il schurnalissem professiunal porscher in cuntrapol cun analisas profundas e contexts.
I na va betg per simplamain tegnair vi il microfon e lura laschar ir quai sur l'emettur – e quai è lura la vardad. Nus stuvain controllar. Nus stuain dumandar suenter.
La lavur schurnalistica pretenda temp per controllar, dumandar suenter e confruntar, quai che stat en cuntrast cun la sveltezza dal mund digital.