Tgi che viva, mora era – quai è bain il principi da basa da l’esser en vita. Mo uschè simpel ed unilateral n’èsi betg; sentiments, experientschas e cardientschas en connex cun la mort èn uschè divers sco quai che nus umans essan.
Il fil cotschen da quest’emissiun èn messadis audio da persunas ch’han respundì a la dumonda, tge ch’il pled «mort» sveglia en ellas. Senza vulair avair la pretensiun che quests messadis cuvrian tut las emoziuns che la mort po svegliar, è questa Marella plitost in invit da seser cun la tematica vid ina maisa, quai senza tabus e sentiments negativs.
Nus stuschain gugent da la vart la mort, sco sch’ella capitass mo ad auters.
En questa collascha datti d’udir diversas regurdientschas en connex cun la mort: il vesair in defunct per l’emprima giada, l’annunzia dad ina mort, rituals exequids, ubain era la preschientscha consolanta dad ina communitad en cas da cordoli.
Pli baud era in mortori insatge che capitava ad in’entira communitad. Ils ultims decennis è la mort dentant daventada insatge fitg privat.
Tranter ils messadis audio che furman quest mosaic acustic, vegn era Arno Arquint a pled. El lavura dapi bun 20 onns sco psicoterapeut a Cuira, quai suenter avair studegià teologia, psicologia e scienzas da religiun. Senza vulair generalisar, è el da l’opiniun ch’i fiss da sa fatschentar pli fitg cun la mort, da la transfurmar en in’amia enstagl da la vesair sco «inimia da la vita».