Tgi che fa vacanzas sin in campadi tschertga la libertad sin quatter rodas, la romantica en la tenda e la quietezza profunda da la natira. Ma fertant ch'ils osps vegnan e van guardain en questa emissiun da la Marella sin las persunas che restan ed èn indispensablas en quest mircrounivers dal campadi: ils gestiunaris.
Er lur vita sa splega di per di sin il plazzal. Er els fan part dal microunivers – schizunt l’autra, indispensabla part da quel.
Muments da legria – varts sensiblas
La plazza dal campadi è in agen mund cun atgnas reglas. Sper ils bels muments cun ils giasts che restan en memoria datti muments che dovran dapli pazienzia. Sco gestiunari èsi da restar flexibel per chattar soluziuns sche problems cumparan.
Ils protagonists èn Ivan Zangerle (55), schef e possessur da la plazza da camping Muglin a Müstair, e Silvana Beer (33), manadra dal camping TCS a Mustér. Tobia Valär ha discurrì cun els dus davart lur mintgadi, lur muments da legria, ma er davart las varts pli sensiblas dal microcosmos plazza da camping – ed ha survegnì invistas en quai che succeda davant e davos las culissas d’in tal lieu.
-
Bild 1 von 4. Ivan Zangerle (55) è schef e possessur da la plazza da camping Muglin a Müstair. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Silvana Beer (33) è fertant la responsabla per il manaschi dal camping TCS a Mustér. Bildquelle: RTR.
-
Bild 4 von 4. Sper ils bels muments ston ils gestiunaris d'in campadi era vegnir a frida cun tschertas sfidas per garantir ina bun'atmosfera en lur microcosmos. Bildquelle: RTR.
Els dus raquintan en questa Marella da lur mintgadi en il microcosmos campadi – tge che funcziuna bain u tge che va fallà sin in campadi, nua che las varts bellas sa chattan e nua ch'i po mintgatant dar puncts da fricziun. Nus udin per exempel tge puncts sensibels ch'i po dar en la tualetta d’in camping, co ch’i vegn cuschinà, pertge che l’electricitad è ina sfida speziala sin e tge ch'ils giasts fan durant l’entir di.
Al campadi sa maschaidan glieud da tut las derivanzas – dal simpel lavurant che sto forsa spargnar per pudair far ina u duas emnas vacanzas sin il campadi fin a persunas ritgas. La cultura u il status na giogan sin la plazza da campar betg pli uschè ina rolla, sco en auters lieus, di Ivan Zangerle.
Tge che collia tuts, saja la motivaziun da far camping e l’avantatg che tuts osps al lieu vesan en questa furma da far vacanzas. La moda da la glieud sin ses campadi saja uschè lucca e differenta, sco ils umans sezs. Durant il temp da stad sa mussia dentant in tschert muster sumigliant pervi dal sulegl a la bell'aura, raquinta Ivan Zangerle.
Quels che stattan l'entir di in pau al sulegl e van en il flum Rom a far bogn, quels èn adina en vestgadira magari lucca.
Schegea ch'i na dettia naginas reglas, saja la stad marcada d'ina atmosfera da flipflops, chautschas da bogn e bikinis. Sumegliant lucs sajan er ils umans sin la plazza da campar dal TCS a Mustér, di Silvana Beer.
Ma areguard las aspectativas che la glieud ha d'in campadi observa era Silvana Beer tschertas differenzas tranter ils umans e tranter lur derivanza. E cunquai vegnin nus tar quella part dal campadi, en quels lieus ch'ins vul tuttina in pau sfera privata:
Nus avain in enorm grond consum da palpiri da tualetta. Nus avain er in grond magasin, jau hai cartì: quai basta segir – ma quai n'ha lura betg tanschì.