Mirjana Negrini è creschida si en il lieu da cura serb Vrnjačka Banja en il sid da Belgrad. Ella sa regorda d'ina uffanza ventiraivla entamez parcs, flurs e funtaunas mineralas. Cun 16 onns vegn ella per l'emprima giada en Svizra. Accumpognand sia sora che lavura en in hotel en il chantun Berna.
Planisadas èn vacanzas, ma or da quellas na vegn nagut. Gia l'emprim di survegn ella in'offerta da job. Dus mais lavura ella en il medem hotel sco sia sora e suenter turna ella mintga stad en Svizra per lavurar.
Durant las vacanzas da studi gudogna ella en Svizra daners per finanziar quel ed emprenda il medem mument tudestg. «Lingua munta communicaziun», di ella guardond enavos. Oz discurra la dunna da 63 onns sis linguas.
L'amur tegna ella en Surses
Cun entschatta ventg vegn Mirjana Negrini lura l’emprima giada a Savognin. Atgnamaintg cun l’intenziun da restar per in temp limità e da turnar lura puspè a Berna. Sia finamira: ina scolaziun en la tgira en il chantun Berna. La conferma per la plazza da scolaziun aveva ella gia en giaglioffa cura ch'ella ha inscuntrà ses um futur. L'amur mida ses plans. Enstagl dad ir a star a Berna cumenza ella a lavurar sco gidantra da tgirunzas en l'ospital da Savognin.
Glisch e sumbriva
L'entschatta dals onns 90 fundeschan Mirjana Negrini e ses um Flavio ina famiglia. Duas figlias vegnan sin il mund,sco emprim Anna, dus onns pli tard Elena. Il temp sco mamma descriva Mirjana Negrini sco in dals pli bels da sia vita. Ma la ventira da famiglia vegn scurlattada: lur figlia veglia Anna mora en la vegliadetgna da be 24 onns d'ina greva malsogna. «Anna viva vinavant en blers pitschens muments», di Mirjana Negrini. Il curaschi da lur figlia d'acceptar situaziuns difficilas e da viver en il mument accumpogna la famiglia fin oz.
Malencurada ed ina nova via
Suenter la mort dad Anna daventa la lavur en la tgira pli e pli engrevgianta per Mirjana Negrini. Accumpagnar persunas sin lur davos viadi da la vita regorda ella memia ferm a l'atgna perdita. Ina chaschun nunspetgada avra ina nova via: Mirjana Negrini survegn l'offerta da lavurar en ina canorta d’uffants. «Uffants regalan tanta spontanitad, plaschair e sinceradad.» di ella.
Cuminanza sco elixier da vita e la forza da la natira
Tgi che discurra cun Mirjana Negrini s'accorscha spert quant impurtanta che la cuminanza è per ella. Ella citescha il filosof Martin Buber ch'ha ditg «Sche nus chalain da s'inscuntrar èsi sco sche nus chalassan da trair flad.» Uschia sa senta er ella.
Questa cuminanza viva ella tranter auter cun chantar en il chor «Cantastic» u en ils inscunters cun autras dunnas en il rudè da dunnas, ch'ella ha fundà avant paucs onns. La cuminanza haja gidà ella da puspè chattar enavos en la vita.
Sper la cuminanza gioga la natira ina rolla centrala en la vita da Mirjana Negrini. Spiritualitad na chatta ella betg en baselgia, mabain dadora, en las muntognas, en ils guauds e las stagiuns.
Malgrà grevs culps dal destin guarda Mirjana Negrini cun fidanza sin sia vita. Ella ha emprendì da laschar tiers tristezza e legria il medem mument cun ina chanzun en il chor, in bun discurs u il tigl en fluriziun davant chasa.