Gist per l’entschatta da l’onn 2025 ha la giuvna gruppa da rock Petta Pagada publitgà lur album da debut. In disc cun 13 chanzuns che porta il num da la band, cun energia e potenzial.
Il duo grischun Happy For Real cun Olivia Virgolin e Marcus Petendi han demussà quest onn ch'i dat anc «endretgs» albums. Cun «Solar Storm» han els preschentà in album da concept nua che mintga chanzun penda ensemen cun las autras e raquintan sur l’entir disc in’istorgia coerenta.
Suenter in disc sin tschertga da ragischs rumantschas ha Martina Linn quest onn publitgà in album multi lingual dentant era fitg reducì, ruassaivel ed atmosferic.
In’atmosfera tut speziala per part bunamain meditativa ed in stil agen preschentan Ann Nielsen e Tumasch è sin lur album actual «cinnamon synonym». In album naschì en il discurs ed experimentar communabel.
Il 2025 hai dà blera musica nova d’artistas rumantschas e grischunas. Tranter auter han ins pudì scuvrir ina nova vusch sin l’EP «Hot Blood» da Flavia Capello. Mintgamai novas plattas da Cinzia (ina EP cun il titel «Per tai»), Nyna Dubois cun ses quart album «Keys to the Heart», Julie Fox cun sia segunda EP entaifer curt temps «Each Heart Is A Garden» sco era las duas «sursguladras» da l’onn Mel D e Gigi Malua che han omaduas gì success era sur ils cunfins Grischuns ora.
Ultra da quai ha il musicist Samy Schmid gist publitgà dus albums. In album live ensemen cun sia band NoFuture e cun ses project da solo SÄM ses segund album.
Quai è be ina survista d’insaquantas publicaziuns grischunas e rumantschas. Igl ha era dà nova musica da rap da Clique713 ubain era in album nov da From Kid e numerusas singles per rumantsch, englais, tudestg etc.
Uschia ha era il 2025 mussà con vasta e multifara che la scena da musica en il Grischun è. Ed i fa gust sin l’onn proxim che spetga franc cun anc dapli musica nova.