Suenter 15 onns èn ils frars Gallagher puspè s’unids, han cun lur gruppa Oasis dà 41 concerts. In deletg per millis e millis fans che han spetgà blers onns sin quella reuniun – e medemamain in plaschair per producents da gervosa. Durant ils concerts saja vegnì consumà 250’000 pints (ca. 142’000 liters), quai è dubel uschè bler sco tar ils anteriurs purtaders dal record Coldplay.
Sch’ins discurra da records en la musica lura è Taylor Swift ils ultims onns era adina da la partida. Ses album actual «The Life of a Showgirl» ha cuntanschì 1,5 milliardas streams entaifer l’emprima emna ed ha emplenì pliras paradas da hits internaziunalas cun las chanzuns da quest album.
Tschintg onns han ils pitschens «monsters» (uschia sa numnan ils fans da Lady Gaga) stuì spetgar sin in album nov. Cun «Mayhem» è ella turnada tar sias ragischs da pop. Ses intent era dentant da derscher in pau «mayhem» (per rumantsch caos) en la musica da pop. Cun elements da rock, disco e jazz ha ella creà in agen stil e gì sumegliant grond success sco Taylor Swift.
La reinvenziun dal pop vegn il 2025 dentant attribuì a la musicista catalana Rosalía. Sin ses album «Lux» ha ella cumbinà flamenco, musica classica, opera e diversas linguas cun la musica moderna electronica ed entusiasmà cun quai experts da musica ed ina gronda communitad da fans.
En Svizra han ins quest onn celebrà la pli gronda concurrenza musicala dal mund. Na, betg l’Open Air Lumnezia – che vegn dentant era a restar en memoria, almain a Grischuns e Grischunas – mabain l’Eurovision Song Contest. Suenter la victoria da Nemo ha l’ESC 2025 gì lieu a Basilea.
Quotas d’auditori, fullas da visitadras e visitaders dissegnan in maletg da success. Igl ha dentant era dà discussiuns enturn la participaziun da l’Israel ch’èn escalads enavant per l’ediziun 2026 en l’Austria. Quai ha chaschunà sditgas da differents pajais e la restituziun da la trofea da Nemo.
Grondas discussiuns ha era la musica da IA chaschunà. Amez l'onn ha la gruppa «The Velvet Sundown» gì grond success – e quai anc avant ch'igl è stà evident ch'i sa tracta d’ina gruppa da IA. Curt suenter ha la plattafurma da musica Deezer tradì che bun 18% da la musica saja creada cun IA – quai èn bun 20’000 chanzuns da IA per di. In'ulteriur chapitel en chaussa hai pir dà da curt che differents radios svizzers han tradì d’emetter durant la notg musica da IA.
Nagina musica da IA mabain rock’n’roll fatg a man era la vita d’Ozzy Osbourne. Il Prince of Darkness ubain il Godfather of Metal è mort ils 22 da fanadur. Quai be paucas emnas suenter in concert da cumià cun divers stars dal rock en ses pajais natal a Birmingham en l’Engalterra.
Quai èn be insaquants puncts culminants da l’onn 2025. En nossa survista da publicaziuns chattais albums ed EPs dal Grischun e la Rumantschia. Per amaturas ed amaturs da la musica folcloristica datti en l’Artg Musical entschatta 2026 in sguard enavos sin las pli bellas festas ed ils pli bels concerts.