La fin d'emna passada è stada la 50avla concurrenza da Brass Band svizra, per la terza e probablamain l'ultima giada en il KKL a Lucerna. (Pervi da lavurs da renovaziun en l'Auditorium Stravinski a Montreux è la concurrenza vegnida translocada a Lucerna).
Las bun 60 furmaziuns èn sa mesiradas en sis differentas categorias da fermezza. En il rom da l'ediziun da giubileum hai dà en tuttas categorias primaudiziuns dals tocs da pensum. La categoria Elita ha sunà «Arden Forest» da Philip Wilby e la GR Brass ha cuntanschì sut la direcziun da Gian Stecher il terz plaz (94 puncts da 100 pussaivels).
La BB Cazis è vegnida setavla cun 90 puncts ed ha uschia er pudì confermar e francar sia posiziun en questa categoria. Els han sunà sut la direcziun da Robin Bartholini.
Impressiuns
-
Bild 1 von 5. GR Brass. Danovamain ha Gian Stecher preparà e manà la band tranter las meglras trais formaziuns. Bildquelle: Etienne Ebornet.
-
Bild 2 von 5. GR Brass. Preschentaziun avant ina gronda culissa. Bildquelle: Etienne Ebornet.
-
Bild 3 von 5. BB Cazis. Robin Bartholini e sia band han mussà ina grondiusa prestaziun. Bildquelle: Etienne Ebornet.
-
Bild 4 von 5. BB Cazis. Cazis e ses maestro – ina cumbinaziun che va bain. Bildquelle: Etienne Ebornet.
-
Bild 5 von 5. MG Risch-Rotkreuz. Il Grischun Roman Caprez po festivar la plazza quatter. Bildquelle: Etienne Ebornet.
Gudagnà en la categoria Elita han ils BML-Talents cun 96 puncts avant la Brass Band Emmental cun 95 puncts. In ulteriur Grischun ha er persvadì. Roman Caprez dirigia la MG Risch-Rotkreuz e lezza è vegnida quarta cun 93 puncts.
Gian Stecher ha er anc gì da sa preschentar cun la Universal Brass Band Wil. Cun la furmaziun d'emprima categoria ed il toc da pensum «La Geometria» da Bert Appermont ha el cuntanschì plazza otg.
Rafael Camartin – campiun
In auter dirigent grischun, Rafael Camartin, po festivar il titel da campiun svizzer en la segunda categoria. Cun il toc da pensum «Lucerne Dances» da Philip Sparke ha la MG Konkordia Aedermannsdorf cun ses dirigent sursilvan cuntanschì 96 puncts.
Resultats
En la pli auta categoria, l'excellenta, ha danovamain la Valaisia triumfà. La band e ses dirigent Arsène Duc po uschia er puspè ir al campiunadi europeic da Brass Band.