L'atun passà ha il parlament svizzer decidì in’offensiva solara. Dapi lura vegn preschentà bunamain mintg'emna en il Grischun in nov project per in implant solar. Betg da smirvegliar. I spetgan subvenziuns federalas da fin 60% dals custs d'investiziun. Ils Cuntrasts sa dumondan: Fan implants solars gronds insumma senn en las Alps? Tgi gudogna, tgi perda? E tge fissan alternativas?
Per pudair far in maletg da la grondezza, da la rentabilitad, dals avantatgs e dischavantatgs dad in implant solar visita la moderatura Anna Serarda Campell l’implant solar da la Rhiienergie AG a Favugn. Quai è in pitschen implant en cumparegliaziun cun quels ch’èn uss en planisaziun en il Grischun. Il mainagestiun Christian Capaul è il partenari d’intervista.
Plinavant èn ils Cuntrasts a Tujetsch, nua che gist dus projects per indrizs solars gronds vegnan planisads. In da l'Energia Alpina, in’interpresa d'energia da la vischnanca, l'auter da la CKW per l'Axpo. Tge interpresa lascha participar pli fitg la populaziun al profit probabel?
Dumondas bun ponderadas
Tge fissan las alternativas per gronds implants solars en las Alps? Quella dumonda tschentain nus a Christ-Andri Hassler, il mainafatschenta da la Hassler Energia a Ziràn che tutga tar las piunieras da solar. Tge di el dals implants solars gronds planisads? Quant realistic è l'urari che dat la Confederaziun? E pon ins insumma nizzegiar il sulegl dapertut, nua ch’i dess avunda? Quai dumandain nus Simon Berger da la Tgira da monuments dal Grischun, cun il qual nus inscuntrain a Luzein il president communal Christian Kasper.
La davosa dumonda respunda Anita Mazzetta, manadra da fatschenta dal WWF Grischun. Tge vegn sut las rodas cun quest tempo d'urgenza pretendì da la Confederaziun?
