(sursilvan) Veis Vus in liug da vacanzas preferiu? Dat ei insumma caracteristicas per bialas vacanzas? Tgei di la bibla pertuccont vacanzas? Lein entrar en quellas damondas.
Diu ni la religiun cumbinein nus pil pli buca cun vacanzas. Il plaid vacanzas anfl’ins strusch ella bibla – denton il concept davostier senza dubi: Il carstgaun enquera adina puspei paus e ruaus. Schizun da Jesus savein nus ch’el tschercava adina puspei in mument da ruaus e quietezia. En fasas da crisa sco si Getsemane encureva el il discuors cun Diu – ed anflava novas rispostas e nova fidonza. Ils giuvnals ha el envidau dad ir en in liug pli ruasseivel per serecunvegnir da lur scharschas, star en cuminonza e guder ina buna tschavera en in bi liug. Els han lu priu la via sut ils peis – e magari schizun la nav – per contonscher il liug giavischau da cuminonza.
Schizun da Jesus savein nus ch‘el tschercava adina puspei in mument da ruaus e quietezia.
La scienzia confirmescha che vacanzas ein impurtontas. Psicologs e psicologas han constatau, che otg dis vacanzas – pia biebein in’jamna – ein per biars in bien diember da dis per serecunvegnir. Ordavon seigi ei impurtont – sche pusseivel – da haver finiu projects impurtonts, quei gidi da liberar il tgau. Avunda temps da pachetar dueigi ins reservar. Tut tenor igl agen caracter e las circumstanzias da viver seigien vacanzas activas ina buna schelta. Auters prefereschien vacanzas pli ruasseivlas. Savens seigi ei impurtont d’anflar in program che seigi in’alternativa enviers la lavur ni la veta da mintga di. Enqualin ni enqualina emprendi bugen enzatgei niev duront las vacanzas ni selegri d’inscunters cun autras persunas e bialas emoziuns. Impurtont seigi ei en mintga cass da risguardar ils differents interess – ils agens ed era quels dils auters.
Tgei ein las pli bialas vacanzas che Vus haveis fatg – ni che Vus saveis s’imaginar? Daco eran quei las pli bialas vacanzas? Tgei savesses oz far per haver semegliontas vacanzas? – Da cor giavischel jeu a Vus per mintga di in pign mument da vacanzas.
