(vallader)
I rapporta l’evangelist Lucas: Bap!
I tradischa l’evangelist Matteus: Bap nos, tü chi est in tschêl!
Santifichà vegna teis nom! scriva Lucas.
E Matteus: Fat sonch vegna teis nom!
Lucas darcheu: Teis reginam vegna nanpro!
E Matteus medemmamaing, pled per pled.
Ils evangelists Joannes e Marcus nu cugnuoschan il Bap nos, Matteus e Lucas però ans fan imprender cun pitschnas differenzas quist’urazchun dvantada uschè importanta per la cretta cristiana.
Sco il Bap nos dan amo in ögl otras passaschas i’ls evangelis suainter Lucas e Matteus cha be quists duos cugnuoschan. Quists texts as sumaglian ferm, schi per part suna bod pled per pled identics. Ils diligiaints lecturs da la Bibla han pervi da quai cumanzà a ponderar scha quists duos evangelists vaivan a lur disposiziun üna funtana cumüna, plü tard ida a perder (la uschè clomada funtana Q). Circa ün quart dals duos evangelis derivess da quella funtana chi raduna impustüt pleds da Gesu.
Quant interessant füssa da pudair leger svess quella collecziun da pleds da Gesu! Chi ha tgnü adimmaint quels pleds? Chi tils ha notà?
Sainz’oter as tratta d’üna ipotesa e listess sdruaglia quella meis buonder e mia fantasia: Quant interessant füssa da pudair leger svess quella collecziun da pleds da Gesu! Chi ha tgnü adimmaint quels pleds? Chi tils ha notà? As müdess alch per no, schi’s chattess ün papirus chi’ns dess ün’invista in quista funtana?
Laiva Gesu chi’s tegna adimmaint precis quists pleds? O nu vaiva’l ingün’influenza sün quist relasch?
Nus nu pudain savair. Quai cha nus savain, es cha Gesu vaiva üna gronda fiduzcha i’l Spiert sonch in reguard a quai chi gnarà tgnü adimmaint d’el: Uschè nu vaiva’l neir brich da pisserar svess per l’algordanza da seis pleds, da sias ideas, da seis fats.
Eir scha’ls evangelis han daspö lönch lur fuorma actuala, vivna eir güst da quai cha quists texts discuorran da generaziun a generaziun illa vita da lecturas e lecturs. Güst uschea suna üna funtana d’inspiraziun multifaria e bod infinita per cristianas e cristians. In quai chi tils unischa, in quai chi tils disferenzchescha, regalna cretta in ün Dieu chi’ns es dastrusch sco ün bap o üna mamma, ans fan inscuntrar al prossem cun charità, ans dan spranza, e toccan adüna darcheu sül viv, i’l temp actual.