(sursilvan) Enconuscheis Vus quei: Enzatgi sevilenta pervia d’enzatgei. Igl emprem vegn el forsa aunc cun bunas ponderaziuns en caussa, in bien argument. E lu vonzei sentan ins: Uss tschontscha buc la sauna raschun, uss tschontscha l’emoziun.
Paulus para mintgaton era dad esser staus da quella sort. Egl 11avel capetel da sia emprema brev a quels da Corint eis el segrittentaus pervia da frisuras e modas da dunnas. Sia conclusiun: Las dunnas duein cuvierer il tgau duront urar e profetisar.
El fa valer sia opiniun ed emprova dad argumentar. Igl ei denton ferm tubac, quei ch’el gi: Ch’igl um seigi il tgau dalla dunna. Ch’ina dunna fagessi zanur agl um senza ver cuvretg il tgau. Talas declaraziuns han formau duront tschentaners la veta da dunnas – savens en ina moda che ha buc fatg bein a lur veta ed a lur dignitad.
Rispostas neschan pér el discuors.
Tgei fagein nus uss cun tals texts? Jeu crei buc che nus duessien zuppentar els. La bibla ed era nus gudignein nuot cun sursiglir las paginas difficilas. Anzi!
Paulus era in um passiunau, el era marcaus da siu temps, viveva amiez conflicts, cumbatteva per quei ch’el cattava per bien. Igl emprem impuls po magari esser che Paulus vegn bein a ver giu raschun en x ina moda.
Jeu crei denton che nus stoppien buc exnum far la gatta morta. Jeu mez hai per moda da presentar mias damondas enviers il text. Jeu cumbattel era mintgaton cun siu messadi ni cuntraponel. Quei che jeu less denton maina far, ei dad interrumper il dialog.
Igl ei in tec sco cul num Israel. Israel vul gir: in che lutga cun Diu. Pia, buc in che capescha adina immediat. Buc in che va adina d’accord. Mobein in che dat buc si il discuors e disput.
Forsa astgel jeu dar quei sco exempel per nossa lectura dalla bibla. Entgins texts consoleschan nus. Auters irriteschan ni vilentan nus. Era lezs audan vitier. Paulus ed auters texts ein bein da leger cun respect, denton buca senza resun critic. Forsa schai lien in punct decisiv: Rispostas neschan pér el discuors. Perquei vala ei la peina da mantener vivs il dialog cun la bibla – cun Diu.
Dil reminent: Las frisuras han disturbau Paulus, denton secapeva ei da sesez per el che dunnas profetiseschien.