Schaner
Il schaner è mintgamai il mais nua ch'ils snowboardist e las skiunzas da freeski s'inscuntran sin il Crap Sogn Gion per il Laax Open. Stil e trics stattan en il center da las concurrenzas en la mesa pipa e sin ils sigls. Er RTR ha rapportà da las concurrenzas sco er da l'atmosfera e da las persunas che fan lavurs davos las culissas.
Il cumenzament dal 2025 ha RTR introducì in chanal da novitads via WhatsApp. Mintga di resumescha RTR la damaun e la saira las pli impurtantas novitads ed istorgias – quellas vegnan direct sin voss telefonin.
Favrer
In sguard davos las culissas da la pli auta plazza aviatica da l'Europa dat il film «Da propellers, cherosin e schampagn – 24 uras a la plazza aviatica da Samedan». El mussa l'impurtanta dal manaschi per l'entira Engiadin'Ota e declera ils virivaris e las dispitas davart la renovaziun da la plazza aviatica ch'è gia dapi in temp necessaria.
Il favrer èn Lai e Lantsch stads mecca dal biatlon. Ils emprims campiunadis mundials insumma en Svizra da biatlon han attirà enturn 80'000 aspectaturas ed aspectaturs, tenor ils organisaturs saja quai dapli che spetgà, els discurran d'in grond success. Medaglias svizra hai però dà naginas, malgrà che las biatletas ed ils biatlets svizzers han mussà bunas prestaziuns n'hai betg tanschì per ina plazza da podest.
Ils Cuntrasts han pudì accumpagnar stretgamain Luana Bergamin e Silvio Baselgia dal comité d'organisaziun ed uschia dar in sguard exclusiv davos las culissas da l'occurenza da sport.
Mars
Il grond classicher il mars è il Maraton da skis engiadinais, la pli gronda cursa populara da la Svizra. Sco mintg'onn n'è RTR betg be a l'ur da la loipa mabain er sin la loipa e sa maschaida tranter las milli curridras e curriders. L'atmosfera da cursa populara è vegnida transmessa via Radio RTR ed in liveticker online.
Avrigl
Tge munta dachasa? Tge furmas d'abitar e da sa sentir dachasa datti? RTR è s'occupà cun las pli diversas dumondas en connex cun esser dachasa ed ha laschà vegnir a pled diversas persunas en connex cun lur chasas, furmas d'abitar e sentiments da sa sentir da chasa.
L'opus 50 «Ina passiun romontscha» da Gion Antoni Derungs è naschida il 1972. L'entira cumposiziun cumpiglia nov carnets cun la passiun tenor l'evangelist Matteus sco era cun chanzuns or da la Consolaziun, in cudesch cun texts rumantschs (sursilvan) vegls.
Matg
Istorgias crimialas fascineschan, tant pli sch'ellas èn capitadas betg lunsch da l'agen isch-chasa. RTR retschertga e raquinta en il «True Crime» da cas criminals dal Grischun. Tranter auter ha il team prendì sut la marella il cas da l'amocader a Cuira, ch'è la finala vegnì mazzà da la polizia ubain raquinta d'in murdraretsch sin incumbensa a San Murezzan cun fastizs en il sid da la Frantscha.
Tradiziunalmain d'Ascensiun datti il final da la Cuppa grischuna. Er quest onn è quai stà in punct culminant per giugadras e giugaders dentant er fans dal ballape regiunal. Cun RTR è il public stà al puls da las equipas – quai betg be durant il gieu via livestream mabain er avant e suenter las partidas. Ids cun la plima èn la finala l'equipa da Domat sco er l'equipa da Schluein Glion.
Zercladur
La musica instrumentala Salouf Mon Stierva ha envidà a festa districtuala da musica ed ha preschentà sia unifurma nova. Ils victurs dal di èn stads la Brass Band Cazis, ellas ed els han tant gudagnà la concurrenza da marschar sco er quella da concert. En tut èn 21 uniuns da musica sa participadas a la festa da musica dal district III (Grischun Central, Plaun, Plessur, Mesauc, Calanca). RTR ha fatg registraziuns da las represchentaziuns, ellas èn da chattar sin Play RTR.
Fanadur
Il mund da ditgas è vast, er il rumantsch. Ina giada dapli è RTR sfundrà en il mund da dialas, diavels e magia. Tadlai las ditgs che derivan mintgina d'ina autra regiun dal Grischun.
La fin fanadur spetga mintga onn l'Open Air Lumnezia a Degen. Per fans da musica e da festivals in dals puncts culminants da l'onn. RTR ha puspè rapportà dals acts musicals, da las istorgias davos e sper la tribuna ed ha transmess ils concerts via livestream. Uschia han er quellas e quels che n'han betg pudì tiers in ticket pudì giudair la musica e quai a chasa sin canapé. Suenter plirs onns è il festival puspè stà vendì ora.
Avust
In dals puncts culminants sportivs è stà da vesair en il resgim a Mollis – tschientmilli persunas han persequità en l'arena da lutga ubain a la televisiun la Festa federala da lutga 2025 ed il triumf dal retg Armon Orlik. Cun sia victoria da festa, malgrà betg esser stà en la lutga finala, ha l'atlet da Maiavilla fascinà il public e procurà ch'il Grischun ha ses emprim retg da lutga insumma. RTR ha accumpagnà la famiglia Orlik durant ils dus dis da festa.
Settember
Ina da las pli grondas carrieras da sport èn idas a fin, Nino Schurter ha terminà sia carriera cun 39 onns. A Lai è el sta per l'ultima giada a la partenza d'ina cursa da la cuppa mundiala. Il Lumnezian ha gudagnà tut quai ch'i dat da gudagnar en il sport da mountainbike – trais medaglias olimpicas, 10 titels da campiund mundial e 36 victorias en la cuppa mundiala. En ses ultim onn da profi ha RTR accumpagnà il sportist.
October
Il Festival da la chanzun rumantscha celebrescha il chant e la chanzun rumantscha. A Vella hai dà in vast program dal chant per uffants fin a concerts cun chantauturas e la concurrenza da cumposiziun per chanzuns da chor.
Tut las registraziuns:
November
En Engiadina è il destin da l'Ospital regiunal Engiadin'Ota stà en il center da l'attenziun. Pliras vischnancas han refusà la cunvegna da prestaziun cun sustegn finanzial. Per l'ospital a Samedan en la furma dad oz è quai stà il culp mortal.
Il derby engiadinais en segunda liga è per ils clubs, giugaders e fans mintga onn in punct culminant. Sin il plaz da glatsch a San Murezzan ha questa giada il CDH Engiadina recaltgà ils puncts e battì l'EHC San Murezzan cun 3:1. RTR ha mussà il gieu en in livestream e rapportà davart la preparaziun da clubs e giugader, las bunas olmas da las equipas sco er co ch'ils giugaders cumbineschan lur professiun cun il trenament intensiv durant ils mais d'enviern.
December
Sco gia l'onn passà hai er dà il 2025 in chalender d'advent auditiv. Il duo da podcast Elias Tsoutsaios e Marcus Petendi han retschavì giasts da surpraisa en il studio e discurrì davart tut ils temas pussaivels.
Er il 2025 ha RTR rimnà ils pli bels muments. Audituras ed aspectaturs han tramess lur pli bellas fotografias da culms, lais, animals da chasa e tschels en las pli bellas colurs.