Sch'i fiss vegnì votà gia ils 23 da schaner 2022, fiss l'iniziativa per in «scumond da far reclama per tubac» vegnida approvada cun 63% da las vuschs. Ina ferma maioritad avess sbittà l'iniziativa per in «scumond d'experimentar cun animals ed umans» (68% Na). Era in Na avessi dà a l'aboliziun da la taxa da bul (53%). Tar il pachet da mesiras per las medias èn ils participants e las participantas dividids (46% Gea e 49% Na). La participaziun fiss cun 50% stada cleramain sur la media dals ultims onns (46%).
Populaziun dividida tar pachet da mesiras per las medias
Tar il pachet da mesiras per las medias datti ina polarisaziun cun ina leva tendenza encunter in Na, decidì n'èsi dentant anc betg. 49% èn cunter il pachet, 46% persuenter e 5% n'han anc betg decis. L'opiniun è ferm dependenta da la lingia politica.
Persunas che simpatiseschan cun la Verda, la Partida socialdemocrata e la Partida verd-liberala, èn per il pachet. Persunas che stattan datiers al center er. Simpatisants e simpatisantas da la Partida liberaldemocrata e da la Partida populara svizra sco er persunas senza partida, èn per il pli encunter il pachet.
I dat qua en egl che cunzunt participantas e participants da regiuns da la champagna èn per il pli encunter il pachet, fertant che pli bleras persunas da regiuns urbanas èn persuenter.
Ch'il nov pachet rinforza la democrazia, è l'argument che persvada ils pli blers ad in Gea (54%). Quai èn 6% pli pauc ch'anc avant in mais. Da l'autra vart èn 56% persvas ch'i n'è betg l'incumbensa dal stadi da proteger singulas branschas da midadas sin il martgà.
Maioritad vul salvar taxas da bul
53% dals dumandads na vulan betg abolir la taxa da bul, 39% fissan per ina midada.
59% dals participants e las participantas èn segiras tge metter en l'urna. Dentant è ina part relativamain auta da 8% anc indecis. Ils arguments sajan plitost flaivels tar questa fatschenta. Uschia han las campagnas bler spazi da giugar.
Il trend tar questa fatschenta è nunusitadamain envers in Na. Tar votaziuns davart propostas da la regenza sa mova l'opiniun dals votants e las votantas normalmain en direcziun da la recumandaziun dal parlament. Abolir la taxa da bul vegn pertschavì sco malgist. Quai sentiment ha gia chaschunà naufragi tar autras votaziuns davart la taxaziun d'interpresas.
Il scumond da reclama per tubac è sin buna via
L'iniziativa per scumandar reclama da tubac vegn anc adina acceptada da la maioritad da la populaziun - ha dentant pers sustegn. Oravant tut l'argument, ch'igl è consequent da scumandar la reclama per uffants sch'er la vendita è scumandada, po persvader votants e votantas.
Ils arguments dals adversaris han dentant pudì persvader pli fitg en il decurs da la debatta. Quai èn:
- L'iniziativa limitescha la libertad economica.
- La protecziun entras il status quo è buna avunda.
- La cuntraproposta dal parlament è meglra.
L'argument che l'iniziativa limiteschia la libertad economica polarisescha tar ils adversaris. 50% èn d'accord cun quest argument, 48% èn da l'opiniun che la midada saja giustifitgada.
Scumond d'experimentar cun animals fiss refusà
68% dals votants e las votantas refuseschan l'iniziativa che vul scumandar experiments cun animals ed umans. Be 26% èn anc persuenter. Cunquai han ils aderents pers entaifer in mais 19% da las vuschs.
En total èn 67% dals dumandads persvas che l'iniziativa vegn refusada. Cumpareglià cun l'emprima retschertga è il foss tranter las schlattainas sa sminuì. Il december eran anc 60% da las dunnas e 33% dals umens per l'iniziativa. Uss èn quai anc 35% da las dunnas e 21% dals umens.
Be radund 63% dals participants han gia in'opiniun decidida. La mesadad da quels e quellas che votassan uss Gea èn anc intscherts. Quai munta che la campagna da votaziun ha anc bunas schanzas da midar opiniuns tar quellas persunas.
