L'avrigl 2022 ha il chantun Grischun nudà 1'415 persunas dischoccupadas. Quai munta ad ina quota da dischoccupaziun dad 1,3%. Quai ha communitgà l'Uffizi per industria, mastergn e lavur dal Grischun. Cumpareglià cun il medem mais da l'onn avant, èn quai radund 1'200 pli paucas persunas senza lavur e la quota era l'onn avant anc tar 2,4%. Da quest temp l'onn passà era il Grischun tranter auter pertutgà da la pandemia e las cifras da dischoccupaziun eran er en l'entira Svizra pli autas.
Cumpareglià cun il mars da quest onn, è il dumber s'augmentà per radund 300 persunas. L’augment saja cunzunt d’attribuir a la fin da la stagiun d’enviern. Perquai haja er la gastronomia nudà il pli grond dumber da dischoccupads.
Ils ultims 12 onns è il dumber da dischoccupads durant l'avrigl, cun excepziun dals onns da pandemia, adina stà tranter 1'700 e 2'500 persunas. La quota durant l'avrigl era normalmain tranter 1,6 e 2,3%. In piz hai lura dà il 2020 ed il 2021 cun passa 3'700 e passa 2'600 persunas dischoccupadas.
Dumber sa reducì er en Svizra
En l'entira Svizra è il dumber da dischoccupaziun er sa reducì sin bun 104'391 persunas. Quai correspunda ad ina quota da dischoccupaziun da 2,3%. Il mars era la quota lev pli auta, tar 2,4%. L'avrigl avant in onn era quella en Svizra anc tar 3,3%.
Pli pauca lavur curta
L'avrigl hajan 166 manaschis survegnì indemnisaziuns per lavur reducida en il Grischun. Quai èn marcantamain pli paucs ch'anc il mars. Là aveva 294 interpresas u manaschis dumandà per indemnisaziuns. Questa cifra na lubescha dentant naginas conclusiuns exactas davart il dumber effectiv d'interpresas che dovran lavur curta. Quels han numnadamain mintgamai trais mais peda d'annunziar quanta lavur curta ch'i han effectivamain gì.
