Siglir tar il cuntegn

Header

Marcus Caduff, Jon Domenic Parolini e Peter Peyer.
Legenda: Part a la discussiun fan ils trais cussegliers guvernativs Marcus Caduff, Jon Domenic Parolini e Peter Peyer. Keystone / RTR
cuntegn

Controvers spezial Pazienza – fin che las mesiras mussan effect

En il Controvers spezial èn stads da la partida ils cussegliers guvernativs Marcus Caduff, Jon Domenic Parolini e Peter Peyer. La discussiun ha moderà Andri Franziscus.

video
Coronavirus: Caduff, Parolini e Peyer en discussiun
Or da Controvers dals 30.11.2021.
abspielen. Laufzeit 57 minutas 57 Sekunden.

Situaziun critica

La situaziun da corona en Grischun è critica. Las cifras èn uschè autas sco anc mai. Da fertant grassescha il virus sur tut tar persunas giuvnas ed en las scolas. Lezzas persunas han normalmain in decurs da la malsogna miaivel. Dentant vegn la situaziun en las staziuns intensivas er adina pli critica. Da 10 letgs sin l'intensiva en l'Ospital chantunal dal Grischun, èn 7 occupads cun pazientas e pazients da corona. Quai è ina chargia fitg gronda per il persunal che na vegnia betg da mantegnair questa prestaziun sur emnas e mais, ha declerà il cusseglier guvernativ Peter Peyer la situaziun en Grischun.

Sche las mesiras ch'il Cussegl federal ha proponì oz bastan per vegnir bain tras l'enviern saja grev da dir, da quest avis èn tuts trais. Ma tuttina saja impurtant da reagir e dad empruvar da rumper la 5avla unda avant che la varianta omicron vegnia dominanta en Svizra.

Vaccinar, vaccinar, vaccinar

Il booster è mess en via en Grischun. Anc adina dettia er emprimas vaccinaziuns, l'emna passada sajan quai stadas radund 400. Ma Peyer di er cleramain ch'i vegnia a dar ina tscherta part da la populaziun ch'ins na vegnia betg da persvader, cun quai stoppian ins viver. Tuts trais cussegliers guvernativs èn sa declerads cleramain cunter in obligatori da vaccinar.

Anc ina giada lockdown?

En l'Austria nua ch'i dat il mument puspè in lockdown van las cifras da cas novs puspè enavos. En la Svizra e la Germania crescha il dumber anc adina. Tuttina na vulan ils trais politichers betg in ulteriur lockdown. Quest donn economic fiss irreparabel, di Jon Domenic Parolini. Perquai valia er dad ina giada laschar mussar effect las mesiras ch'il Cussegl federal decidia la finala.

Damai ch'i dat uss er desditgas en hotels grischuns, perquai che tscherts pajais èn sin la glista da quarantina na pon ins betg exclauder ch'il turissem vegn a patir quest enviern. Las mesiras per lavur curta èn anc adina en funcziun. Tuttina di Marcus Caduff che la finamira stoppia restar da pudair turnar tant pli svelt a la normalitad.

Spetgar tge ch'il Cussegl federal decida

Sco Jon Domenic Parolini di, vulan ins elavurar vinavant las strategias ch'ins haja gì l'onn passà durant l'enviern. Uschia possian ins meglierar la situaziun. Desister da tuttas occurrenzas na veglian ins betg. Las cursas da skis da la cuppa mundiala u er la Cuppa Spengler hajan ina gronda impurtanza ed ins veglia sche pussibel realisar quellas cun aspectaturas ed aspectaturs, sa chapescha cun mesiras da protecziun.

Marcus Caduff accentuescha ch'ins veglia empruvar da restar avert e da chattar adina novas vias. L'onn passà saja gartegià bain da chattar l'equiliber tranter il minimum dal donn per l'economia ed er in minimum tar las unfrendas cun la situaziun ch'era avant maun.

Cura va questa pandemia a fin?

Marcus Caduff vesa sco suletta varianta d'emprender d'ir enturn cun il virus. Pertge quel na giaja betg pli davent ed er cun novas variantas ed undas na possian ins en l'avegnir betg pli serrar si tut.

Jon Domenic Parolini respunda ch'i saja er d'emprender d'ir enturn cun la mort. Pertge la mort tutgia tar la vita.

Peter Peyer è da l'avis ch'il vaccinar gidia, ma cura ch'i va a fin quai possia nagin dir. Be co sa proteger uschè bain sco pussaivel.

RTR Controvers spezial

Artitgels legids il pli savens

Scrollar a sanestra Scrollar a dretga