La caricatura è vegnida publitgada en il magazin «Charlie Hebdo» il venderdi passà, il medem di che la Svizra ha fatg il di naziunal da cordoli per las victimas da Crans-Montana. Da vesair è in skiunz che arda ed in ch’è ars. Sin ina tavla a l’ur da pista è scrit «Crans-Montana». Sin la caricatura è anc scrit «ils ars van cun skis» ed era «la cumedia da l'onn». Questa caricatura ch’il magazin satiric franzos ha publitgà è ina allusiun a la cumedia franzosa «Les bronzés font du ski».
Rolf Giger è sez caricaturist e malegia tranter auter per il Bündner Tagblatt. Tenor el datti intginas chaussas che van betg tar la satira – per exempel da far beffas sur la cretta e sur catastrofas, sco questa da Crans-Montana.
Quai è per mai nagina cumedia, mabain insatge fitg tragic. Da trair atras la merda insatge che ha fatg donn ad autras persunas, custà la vita e laschà enavos nattas per tut la vita, quai va per mai memia lunsch.
In’opziun fiss tenor el stà da far ina caricatura dal possessur da la bar, dentant era là hajan ins dad esser fitg precaut sco caricaturist. I detta numnadamain in principi che di, ch’ins possia plitost ir encunter quels pli ensi, per exempel politichers. E betg zappar sin quests sutvart sco en quest cas las victimas.
Reacziun sin critica cun segunda caricatura
Igl ha dà gronda critica, perfin era in’accusaziun encunter il magazin. Sinaquai ha «Charlie Hebdo» publitgà ina segunda caricatura. Sin questa èn da vesair persunas enturn la maisa da la redacziun ch’èn vegnidas cuppadas cun frizzas d'in balester. Giu per terra è da vesair sang ed en la porta stattan dus svizzers, dus balestrers. Sin la caricatura è scritta la dumonda «Pon ins blastemmar cun Svizzers e Svizras?».
Questa caricatura sa regorda a l'attentat dal 2015 ch’è vegnì fatg sin la redacziun da «Charlie Hebdo». Suenter ch’il magazin ha fatg diversas caricaturas dal profet Mohamed han terrorists islamistics cuppà 12 persunas da la redacziun. Questa segunda caricatura saja tenor Rolf Giger grategiada. I dat ina istorgia vitiers ed i va betg encunter las victimas da Crans-Montana. Tenor el mussa questa reacziun da «Charlie Hebdo» che la redacziun na sa lascha betg prender il curaschi suenter critica, mabain reagescha cun ina caricatura ch’els fan beffa da lur atgna catastrofa.