Ils trais economs David Card, Joshua Angrist e Guido Imbens partan il Premi Nobel per economia. Quai ha l'Academia roiala svedaisa da la scienza annunzià.
David Card dal Canada vegn onurà per sias contribuziuns empiricas da l'economia dal martgà da lavur. Joshua Angrist, dals Stadis Unids e l'Ollandais Guido Imbens survegnan il premi per lur contribuziuns metodicas a l'analisa da las relaziuns causalas. Tuts trais perscruteschan en ils Stadis Unids da l'America.
Tar las scienzas socialas na possian ins betg lavurar cun experiments randomisads, di Peter Frederiksson, parsura dal comité da Nobel responsabel. Midadas natiralas u politicas stgaffeschian dentant mintgatant situaziuns che sumeglian a quels experiments.
Ils onurads han mussà che tals experiments natirals gidan da respunder impurtantas dumondas da la societad.
Las contribuziuns dals trais economs hajan refurmà la lavur empirica da las scienzas da l'economia e meglierà la capacitad da respunder dumondas causalas da gronda impurtanza.
Il Premi Nobel per economia datti dapi la fin dals onns 1960 ed è il sulet Premi Nobel che n'è betg inizià dad Alfred Nobel. El vegn dentant era surdà uffizialmain ils 10 da december. Il di da mort d'Alfred Nobel.
