Siglir tar il cuntegn

Header

audio
La situaziun actuala a Beirut
Or da Actualitad dals 20.08.2020.
laschar ir. Durada: 2 minutas 18 Secundas.
cuntegn

Suenter explosiun gigantica È il Libanon in pajas ch'ha fatg naufragi?

L'explosiun en il port da Beirut è mo stada il punct culminant d'ina crisa che cuzza gia pli ditg. Paupradad, ina crisa da finanzas e politichers corrupts chaschunan gia daditg problems en il pajais cun bun 6 milliuns abitants.

La populaziun libanaisa è desperada. L'inflaziun, la crisa da finanzas, la paupradad – ed uss er anc il coronavirus e l'explosiun en il port da la chapitala ch'ha destruì grondas parts da Beirut. Tut quai fa che la gritta sin l'elita e sin la politica corrupta è creschida fermamain, quai raquinta Susanne Brunner la correspundenta da SRF en il Proxim Orient. Ella ch'è mitschada da l'explosiun enorma en il port da Beirut, perquai ch'ella ha gì retard.

audio
Co è la situaziun daventada uschè precara en il Libanon?
ord Actualitad dals 20.08.2020.
laschar ir. Durada: 4 minutas 23 Secundas.

Corrupziun e nepotissem dapertut

Entras l'explosiun è la situaziun da la populaziun anc vegnida pli precara che quai ch'ella era gia. L'istorgia dal Libanon è numnadamain sanguinusa. Il pajais è adina puspè stà occupà da pussanzas grondas. E cura ch'ella saja daventada independenta haja adina puspè dà guerras, er guerras civilas aifer il pajais. La pussanza saja lura dentant vegnida partida si tranter las differentas religiuns e partidas politicas – dentant tenor Susanne Brunner hajan tuts mo guardà per sasez. Corrupziun e nepotissem tutgian vitiers en il Libanon. Er anc oz.

Regenza è sa retratga

Malgrà che la regenza actuala è sa retratga curt suenter l'explosiun, vesa Susanne Brunner nair per il pajais oriental. Uss sa charplinia numnadamain anc adina l'elita politica veglia per la pussanza. Il pajais dovria dentant novas forzas – frestgas e cumpetentas per pudair far refurmas. Quai stoppia l'elita politica veglia dentant anc vesair en. Prognosas co i pudess ir vinavant cun il Libanon, na sappia e veglia Susanne Brunner betg far. Ella discurra dentant d'in «failed state» d'in pajais ch'ha fatg naufragi.

RTR actualitad 11:00

Artitgels legids il pli savens