Cura ch'in pur u ina pura sega ses prà ha in effect sin quants daners ch'i dat da la Confederaziun. Per l’ina dependa dal prà sez e nua che quel giascha, pia en tge zona, e per l’autra da la data, pia cura ch'il prà vegn segà. En il Grischun tutgan passa 80% dals prads tar las zonas da muntogna 3 e 4.
Ed entaifer questas zonas datti anc ina surfatscha che vala spezialmain da proteger: L'uschenumnà «terren per promover la biodiversitad». Sco Michael Burkard da l'Uffizi d'agricultura chantunal declera, ston purs en la Svizra proteger minimum 7% da lur surfatscha ch'els cultiveschan en favur da la biodiversitad. En il Grischun èn quai en media sur l'entir chantun rodund 38%.
Ord vista da la biodiversitad è quai aut pertschient en il Grischun fitg da beneventar, dentant munta quai era tschertas restricziuns per ils purs.
Quai munta che avant ils 15 da fanadur na dastgan questas surfatschas spezialas betg vegnir segadas, uschiglio na datti nagins daners da la Confederaziun. Quest onn, perquai ch'igl è spezialmain chaud e sitg, hai dentant dà dapli dumondas da purs e puras per ina permissiun speziala da pudair segar quests prads avant quests termins definids. Miachel Burkard ha chapientscha per questas dumondas ed agiunta che là nua ch'i giaja emprovian els da vart dal chantun da porscher man. Quai possian els dentant mo far punctualmain e quai mo entaifer tscherts projects nua che termins flexibels vegnian per exempel gia examinads – e betg sur l'entir chantun e per tut ils puressers.
Il spazi d'agir da vart dal chantun empruvain nus da nizzegiar uschè bain sco pussaivel. Dentant cumonda la Confederaziun davart quests termins fixs. Qua na po il chantun far nagut.
Divers projects èn gia iniziads
La Confederaziun saja dentant conscienta da las sfidas ed i vegn gia uss discutà davart termins pli flexibels. Ch'i dovria dapli flexibilitad, da quest avis è er Thomas Roffler, president da l'Uniun purila grischuna.
Il squitsch da segar tut quellas surfatschas il medem di vegniss pli pitschen quai vegniss era da bun a la biodiversitad. Ils insects pudessan uschia guntgir sin autras pradas.
Plirs projects èn gia iniziads: Uschia per exempel in project ch'examinescha tge consequenzas che termins da far fain pli flexibels han per l'ina sin la racolta e per l'autra sin la biodiversitad. E tgisa? Forsa datti a partir da l'onn 2030 cun la nova strategia d'agricultura federala auters termins. Termins pli flexibels.