Pestgaders han constatà la dumengia bun'ura che l'Alvra manava praticamain nagina aua pli sper Seglias en Tumleastga, perquai han els contactà immediat la Polizia chantunala dal Grischun. Emprims scleriments ensemen cun il survegliader da pestga responsabel han mussà ch'in disturbi tecnic en l'ovra electrica da la EWZ da Seglias Alvra ha chaschunà ch'il quantum d'aua en l'Alvra è sa sminuì fitg svelt e ferm – quai da 17 meters cubics sin 4,4 cubics. Quai ha ditg Marcel Michel, il co-manader da l'uffizi da chatscha e pestga dal Grischun.
Entras il disturbi tecnic èn tenor communicaziun grondas parts da l'Alvra ed en consequenza er parts a la riva dal Rain Posteriur stadas sitgas – quai per radund in'ura.
Consequenzas ecologicas a lunga vista
Malgrà l'engaschament dals pestgaders ch'han pudì metter enavos passa 100 peschs en il curs dal flum, sajan sin radund 15 kilometers plirs millis peschs crappads. Pertutgadas sajan cunzunt stads stads rambots e litgivas d'aual giuvnas che n'han betg pudì reagir uschè svelt sin las midadas dal flum. Sco Michel di, sajan prubabel plirs milli peschs crappads.
La regiun dal flum pertutgà vegn populada mintg’onn cun var 20’000 giuvnas litgivas d'aual. Perquai che quest’annada gist messa en l’aua è vegnida per part destruida tras l'incap, dettia en trais onns cleramain damain litgivas d'aual per la pestga, di Michel. Per cumpensar questa perdita, vul l’Uffizi mantegnair la strategia da repopulaziun e rinforzar eventualmain schizunt la repopulaziun da peschs durant ils proxims dus onns. La spezia da peschs protegida «rambot» na vegn betg repopulada, uschia ch'ella sto sa revegnir da sezza. Tenor l'Uffizi da chatscha e pestga dal Grischun n'hai dà nagins incidents cumparegliabels ils ultims decennis.
Segunda annunzia entaifer paucas emnas
I sa tracta gia dal segund incident en il Grischun entaifer paucas emnas. Ils 25 da zercladur èn medemamain plirs millis peschs crappads en il Lai da Sufers. Ils peschs eran derasads a la riva dal lai da fermada sin ina surfatscha da radund 800 meters.
Entant èsi cler che questa muria da peschs n'ha betg da far sco en il pli nov cas cun la producziun d'electricitad. Quai ha la polizia chantunala dal Grischun medemamain communitgà il mardi. Las midadas dal livel dal lai sajan stadas en il rom dal manaschi ordinari ed uschia tenor disposiziuns da concessiun valaivlas, scriva la polizia chantunala.
Actualmain vegnia sclerì la creschientscha massiva d'algas en la regiun da la riva e las cundiziuns da l'ambient ch'èn sa midadas tras quai e ch'èn eventualmain s'accentuadas en interacziun cun las midadas ordinarias dal livel dal lai.