Litschalas en l’En
L’Engiadin’Ota è in dals ultims lieus nua ch'i dat anc litschalas, per tudestg «Äschen». Dentant era en l’En datti adina pli paucas. La raschun è ch'i è vegnì pestgà bler ils ultims onns e ch’il spazi da viver vegn mender e mender. Vitiers vegn ch’in’entira generaziun è sa decimada pervia d'auas grondas l'onn 2019. In onn pli tard hai dà ina muria dals peschs sut S-chanf. Pervia da quai ha l’Uffizi da chatscha e pestga dal Grischun decis trais mesiras:
- La stagiun da pestga vegn spustada enavos per duas emnas. Ella cuzza pia dals 15 fin ils 30 da zercladur. Uschia han ils peschs avunda temp da sa remetter suenter lur temp da fregar, pia da metter ora lur ovs.
- Ins na po betg pestgar cun mintga preda: verms èn scumandads, peschs d’estga («Köderfische») pon ins duvrar. Il motiv è che peschs traguttan intginas predas ed uschia èsi grev da prender ora quels e metter enavos en l'aua ils peschs ch'èn per exempel memia pitschens.
- Questa stagiun po mintga pestgader e pestgadra mo prender ora 10 litschalas.
Peschs en la Maira
En la Maira, il flum en la Bregaglia, na datti betg pli peschs suenter ch’i ha dà bovas la stad passada. Per questa raschun èsi scumandà da pestgar. Il chantun ha decis da recolonisar là ina nova populaziun da peschs.
Peschs en l’Aual da Masein ed l'Aual da Suden
En ils dus auals hai dà accidents da puschina. Ad in pur è la puschina vegnida en l’aua. Ils peschs sajan alura morts u ids davent.
Pia: En ils auals menziunads na pon ins betg pestgar il prim da matg. Quant ditg che quellas mesiras cuzzan dependa quant spert ch’ils peschs sa remettan.
