Sche persunas en Svizra vegnan en difficultads finanzialas, pon ellas dumandar agid social. Quest agid procura ch'ellas hajan il pli necessari per viver, sche lur atgna paja ed auters agids finanzials na bastan betg u na vegnan betg pajads ad uras. L'onn 2024 èn las cifras en il Grischun puspè ina giada idas enavos.
En l'onn 2024 han radund 2081 persunas survegnì agid social, quai è var in 1% da la populaziun grischuna. En auters pleds: mo mintga tschientavla persuna en il Grischun survegn agid social.
Cun quai sa reducescha la quota il 2024 per 0,1 puncts procentuals. En cumparegliaziun cun la Svizra èn las cifras d'agid social en il chantun Grischun considerablamain pli bass, en Svizra è la quota s'augmentada da l'onn 2023 a 2024 per 0,1 punct procentual, pia exact il cuntrari dal svilup dal chantun Grischun.
Quai che saja spezial en il Grischun saja ch'i dettia bleras plazzas da lavur, nua ch'ins na dovra nagina scolaziun professiunala. Perquai sajan las cifras pli bassas, cumpareglià cun l'entira Svizra, di Susanna Gadient, la manadra da l'uffizi dal servetsch sozial Grischun.
Però n'è la distribuziun betg regulara entras la populaziun grischuna. I dat tschertas gruppas pli vulnerablas che autras, en il Grischun sa mussa ina clera differenza tranter las vegliadetgnas. Uschia è la quota d'agid social bler pli auta tar persunas pli giuvnas da 17 onns e sut, nua che 1,9% da las persunas dovran agid social. Quels uffants e giuvenils fan savens part d'ina famiglia cun be in genitur che na po savens betg lavurar pervia da la tgira d'uffants, di Susanna Gadient.
Da l'autra vart è la quota tar persunas da 65 onns e dapli cun 0,2% bler pli bassa che la media dal Grischun da 1%.
Cumparegliaziun cun l'entira Svizra
Sch'ins guarda sur tut la Svizra e conguala las differenzas tranter ils chantuns, èsi da constatar in tschert foss dal rösti («Röstigraben») cun in'excepziun dal chantun da Friburg nua che la quota d'agid social è pli bassa che la media svizra. Il chantun cun la pli auta quota d'agid social è il chantun Genevra cun 6,7%, suandà dal chantun Neuchâtel cun 5,7%.
Tge ch'ins vesa er è ch'ils chantuns da la Svizra Centrala ed il chantun Grischun èn ils chantuns cun la quota d'agid social la pli bassa cun quotas tranter 0,8% e 1,3%.