Testai Vossa savida en il quiz da pestga, tut las infurmaziuns chattais Vus en quel artitgel:
Per ir a pestgar dovra mintga pestgadra e pestgader ina patenta da pestga. Quels po ins cumprar tar l'Uffizi per chatscha e pestga. Però dovr'ins per la patenta da mais e da l'onn in attest davart las enconuschientschas da la materia (AEM). Davos quel grond term sa zuppa ina scolaziun da pestga ch'ins sto absolver avant che pudair cumprar ina patenta.
En quel curs da pestga emprend'ins tranter auter dapli sur da la lescha da pestga ma era sur da las differentas spezias en la Svizra ed en il Grischun. La protecziun dals animals e la durabilitad en la pestga furma in auter chapitel en il curs. Cleramain vegnan era tematisadas tecnicas da pestga e l'equipament ch'ins dovra. A la fin sto mintgin far in examen per acquirir l'attest. Il curs custa tranter 50 e 100 francs tut tenor l'organisaziun che porscha il curs.
Patentas vendidas restan constantas
Tar il chantun po mintga pestgadra e pestgader decider tranter ina patenta dal di, da l'emna, da mez mais, dal mais e da l'onn. L'Uffizi per chatscha e pestga publitgescha mintg'onn ina statistica da las patentas vendidas. Tenor quel rapport annual èn las patentas vendidas en ils ultims 10 onns restadas sin in relativamain constant nivel.
Ina excepziun furma l'onn 2020 nua che las patentas dal dis èn siglidas sin pli che 6'800 patentas ch'il chantun ha vendì en quel onn. Per cumparegliaziun: la media da las patentas vendidas era circa 4'500.
La pli probabla explicaziun per quel fenomen è che la pandemia ha influenzà quella cifra enorma.
Peschs pestgads, ina survista dals ultims 20 onns
Var 4'840 hectaras da las surfatschas d'aua dal chantun Grischun èn decleradas sco «aua da pestga», quai tenor la banca da datas da l'Uffizi da chatscha e pestga. Quella surfatscha correspunda a circa 0,5% da l'entira surfatscha dal chantun.
Sut quellas surfatschas vegn pestgada mintg'onn. L'Uffizi da chatscha e pestga na surveglia betg mo las cifras dals peschs pestgads mabain era las spezias che vegnan pestgadas.
Sche Vus duvrais er in pau agid cun il vocabulari da peschs, qua ina survista dals peschs ils pli impurtants en il chantun Grischun:
Novas reglas e midadas per ina pestga pli durabla
Quest onn ha l'Uffizi da chatscha e pestga publitgà las novas prescripziuns da pestga. En quellas datti diversas midadas e restricziuns, quai per garantir ina pestga ch'è dapli durabla e procura per ina natira sauna ed effectivs da peschs persistents. Qua ina survista dals midaments ils pli impurtants:
Pesch da l'onn 2026
La Federaziun svizra da pestga ha elegì quest onn in pesch tut spezial: la frilla.
Il pesch pitschen è bain anc da chattar en bleras auas en Svizra ed el è er en grondas quantitads en intgins lais da muntogna. Ma or da numerus auters spazis da viver è el dentant svanì. Insatge che fa la frilla uschè speziala, èn novas examinaziuns geneticas che han mussà: en Svizra existan almain quatter differentas spezias da frillas. Fin uss han ins be savì dad ina singula spezia.