Laschar cussegliar tar ina decisiun medicinala, chapir meglier ina diagnosa u forsa chattar in'alternativa a la terapia ch'il medi ha proponì - quai capita en il «Café Med». Ina purschida gratuita, organisada da la «Akademie Menschenmedizin» (amm), in'organisaziun ch'ha sco finamira da cumbatter il patratg economic, cura ch'i va per la medischina.
Il «Café Med» datti en nov citads da la Svizra – dapi il 2022 er a Cuira. Uss dentant en in auter lieu che fin uss: numnadamain en il Café du Théâtre amez la citad da Cuira. Il «Café Med» a Cuira ha lieu mintga segund mardi dal mais.
Avair temp è fitg impurtant
Ils dus facturs ils pli impurtants dal «Café Med» sajan la cussegliaziun independenta e surtut d'avair temp, di Basil Caduff ch'è il patrun da tut ils «Café Med» en Svizra. Tar ina cussegliaziun en l'ospital u tar il medi da chasa hajan ils medis savens betg dapli temp che 15-20 minutas per il pazient. Il pli vegnia la persuna pertutgada gist sezza cun sia dumonda. Savens saja quai glieud pli veglia, di Basil Caduff. Quai per la simpla raschun ch'ins haja pli savens problems da sanadad cun la vegliadetgna avanzada.
Nus avain temp fin che l'ultima dumonda è sclerida.
Il pli savens vegnian persunas cun dumondas tar ina diagnosa ch'ellas na chapeschian betg cumplettamain. U cun dumondas sch'i dettia in'alternativa ad ina terapia u operaziun ch'il medi haja cusseglià. Il spectrum da temas saja fitg vast.