Legenda: Lumenzia RTRLumnezia
En la Lumnezia na datti il futur naginas rodas da vent. En ina votaziun consultativa han 55,8% da las votantas e dals votants da la vischnanca da Lumnezia ditg Na al parc da Vent. La participaziun a la votaziun è stada tar bunamain 60%. Uschia na vegn il project parc da vent betg persequità vinavant. Questa visiun aveva leventà ils ultims onns blera pulvra. –– Ad ina segunda fatschenta, la revisiun parziala da la constituziun, han ils Lumnezians e las Lumnezianas ditg Gea.
Legenda: San Murezzan RTRSan Murezzan
Cun 75% da las vuschs han votantas e votants da San Murezzan approvà il credit da bunamain 39 milliuns francs per construir la chasa da tgira «Du Lac» che vegn a porscher 60 letgs da tgira e 17 abitaziuns per seniors. Plinavant ha il suveran detg Gea a la revisiun parziala da la planisaziun locala «zona speziala Du Lac» ed al contract concernent la collavuraziun intercommunala per fabritgar il center da vegls.
Legenda: Samignun RTRSamignun
In cler Gea per il project «Chüra futura» en Engiadina Bassa. Passa trais quarts dals votants e da las votantas da Samignun han approvà il project che prevesa d’integrar la Chasa Puntota en il Center da sandà Engiadina Bassa (194 vuschs Gea, cunter 65 vuschs Na.) 210 votantas e votants han ditg Gea, 65 Na. Plinavant liberalisescha Samignun ils temps d'avertura da las butias e prolunghescha las uras da polizia. Questa votaziun è stada cun 52% Gea pli pauc clera (144 vuschs Gea cunter 129 Na). Il suveran da Samignun ha er approvà la revisiun parziala da la lescha d’ustaria cun passa 76%.
Legenda: Scuol RTRScuol
Il suveran da Scuol di cler Gea al project «Chüra futura, l'avegnir da la chüra in Engiadina Bassa» che prevesa d'integrar la Chasa Puntota en il Center da sanadà Engiadina Bassa, curt CSEB. Passa 86% da las votantas e dals votants da Scuol din Gea a la fusiun. Tranter auter duai quella gidar ad optimar las lavurs en secturs sco l’administraziun, la cuschina, la linscharia, tecnica ed auter pli.
Legenda: Zernez RTRZernez
La vischnanca da Zernez adattescha sia planisaziun locala. Dus terzs da las votantas e dals votants da Zernez han approvà duas revisiuns parzialas. Questas revisiuns pertutgan la lescha communala d'abitaziuns secundaras e l'inventari dals fabricats caracteristics dal lieu (133 vuschs Gea, 61 vuschs Na), ed il spazi da la protecziun da las auas (133 vuschs Gea, 61 vuschs Na).
Legenda: Domat RTRDomat
Votantas e votants da Domat han approvà il preventiv 2020 cun 897 cunter 96 vuschs. Il preventiv quinta cun expensas da CHF 35‘953‘210 ed entradas da CHF 35‘710‘300, uschia ch'i resulta in surpli d'expensas da CHF 242‘910. Plinavant han ils da Domat decis da laschar il pe da taglia sin 87% da la taglia chantunala simpla.
Legenda: Medel RTRMedel/Lucmagn
Las votantas ed ils votants da Medel/Lucmagn han cleramain approvà (147 Gea cunter 28 Na) ina midada d'utilisaziun da la chasa da scola a Curaglia cun conceder ina credit da CHF 2'640'000. Uschia pon ins ussa realisar il project da 5 fin 6 abitaziuns per persunas attempadas.
Legenda: Tavau RTRTavau
La vischnanca da Tavau ha approvà la revisiun totala da la constituziun communala sco era la lescha davart ils dretgs politics, mintgamai cun 86% da las vuschs. La constituziun communala d’enfin uss è vegnida approvada ils 30 da mars 1919 e festivescha quest onn ses 100avel anniversari. En il decurs d'in tschientaner è bler sa midà, uschia ch'igl e stà uras d'adattar la constituziun communala al temp dad oz. La participaziun ha muntà en omaduas fatschentas bun 19%.
Legenda: Landquart RTRLandquart
Il suveran da Landquart (quai èn las vischnancas Igis, Mastrils e Landquart) han approvà cun 591 cunter 198 vuschs la revisiun totala da la constituziun da vischnanca. Uschia po Landquart adattar la constituziun communala confurm al temp.
Legenda: Zezras/Zizers RTRZezras/Zizers
Zezras ha approvà la midada da furma giuridica da la GEVAG (Corporaziun da vischnancas per l'allontanament da rument en il Grischun) d'ina corporaziun tar ina instituziun dal dretg public. Quai cun 85% da las vuschs. L'actuala corporaziun da vischnancas vegn schliada ed ins sto fundar ina nova instituziun dal dretg public. La midada basegna il consentiment da tut las vischnancas purtadras. Er la lescha davart la corporaziun da dretg public ha il suveran da Zezras approvà.
RTR novitads 12:00