En il Grischun è la situaziun da novas infecziuns da corona stabila. Perquai na dovri tenor la regenza grischuna actualmain naginas ulteriuras mesiras:
Actualmain desista il chantun da prender ulteriuras mesiras, sco per exempel da limitar la grondezza da gruppas da persunas u l'obligaziun da purtar ina mascrina en butias e negozis.
En ina communicaziun a las medias dat il Departament da giustia, segirezza e sanadad ina survista da la situaziun actuala pervi dal coronavirus en Grischun:
- 5 persunas èn en isolaziun
- radund 30 persunas èn en quarantina
- nagin dovra agid en ospital
Il contact tracing funcziunia e per cas dad ina segunda unda sajan las resursas persunalas necessarias garantidas, er sch'il dumber da cas s'augmentia, scriva il departament.
En vista ad ina pussaivla segunda unda da la pandemia ha il chantun elavurà in concept. Quel saja pront en in pèr dis.
Plinavant è il post d'annunzia en funcziun. Là stoppian s'annunziar persunas, che vegnan ord ina regiun cun grond risico d'infecziun.
Ellas sajan obligadas dad ir en quarantina – en cas cuntrari possia quai dar ina multa, fa a savair il chantun.