L'analisa da la citad haja mussà che Cuira ha basegn d'in hotel. Ins haja evaluà per l'areal visavi la staziun a val da la pendiculara Brambrüesch divers scenaris ils davos onns, ha ditg Benno Patt, il responsabel immobiglias da la Cassa da pensiun dal Grischun. Surfatschas da biro u per affars na sajan il mument betg attractivas avunda per Cuira - quai mussia in sguard sin ils objects libers. Il medem mument saja il lieu damanaivel da la citad optimal per abitaziuns e per in hotel. Sper il hotel cun 70 chombras realisescha la cassa da pensiun era ina chasa da tschintg auzadas cun bun 30 abitaziuns.
Critica vers in hotel
Davos las culissas vegn il hotel crititgà. La Cassa da pensiun dal Grischun duai construir abitaziuns pajablas e betg in hotel, audan ins da diversas varts. S'exponer direct na vul dentant nagin. Roland Alder che posseda en il Welschdörfli duas chasas ha fatg recurs cunter il plan da quartier. El di: «Jau na sun betg cunter in hotel. La cassa da pensiun dentant havess tenor mai autras obligaziuns» che construir in hotel. Tenor el havess la cassa da pensiun era pudì realiasar ina chasa cun abitaziuns sper la via da la caserna. Quai saja ina schanza manchentada.
Benno Patt chapescha bain las resalvas, è il medem mument però er persvadì dal project. «Cun noss partenari e specialist quai che pertutga manar in hotel en ina citad avain nus in pitschen risico e la rendita constat tuttina». Davart Hotellerie Suisse Grischun saja mintga hotel bainvegnì. Commentar la critica ch'ins auda na vul l'uniun betg. Cuira Turissem beneventa la purschida supplementara cun chombras da hotel.