I sa tracta d’in artitgel ch’è vegnì publitgà en la Südostschweiz il fanadur 2024. En quest èn vegnì fatg rinfatschas encunter l’anteriura manadra da l’uffizi da cultura, Barbara Gabrielli. Tenor las directivas publicisticas vessan schurnalists e schurnalistas da laschar vegnir a pled las persunas ch’èn pertutgadas da rinfatschas. En il artitgel da la Südostschweiz na saja quai betg stat il cas e pervia da quai ha la regenza Grischuna fatg recurs tar il Cussegl svizzer da pressa. Quai èn ils suandants dus puncts:
- Tschertga da la vardad: Tenor la regenza na saja quai betg correct che i ha dat proceders da mobing pervia da la manadra da l’uffizi.
- Audiziun tar rinfatschas grevas: La manadra avess stuì avair la pussaivladad da vegnir a pled.
Nus n'essan betg stads dal tut perina cun questa valitaziun (en il artitgel). Areguard la obligaziun d’assistenza envers noss collavuraturs e collavuraturas avain nus decidì da far quest recurs. Uss avain nus clerezza e quai è bun uschia.
La regenza survegnì raschun parzialmain – vul dir ch’il Cussegl da pressa è era da l’avis che quai era in sbagl che l’anteriura manadra na è betg vegnida a pled.
Che la Südostschweiz ha en rapportaziuns pli veglias ed era al di da la publicaziun da quest artitgel dat la schanza per prender posiziun, na lascha il Cussegl da pressa valair. Il manader da la schefredacziun da la Südostschweiz, Joachim Braun ha chapientscha per quai.
Nus na pudain betg curreger che nus n'avain da quest temp betg discurrì cun ella. (...) E questa istorgia è uss gia uschè daditg passada, ch'i na gidass nagut da uss discurrer cun ella.
Las decisiuns dal Cussegl da pressa èn recumandaziuns – portan dentant cun sai naginas sancziuns.
Tschertga da la vardad
Tar il segund punct dal recurs èsi Ì per la tschertga da la vardad. La regenza era da l’avis che i saja betg vaira che i haja dat proceders da mobing encunter l’anteriura manada da l’uffizi da cultura. En il artitgel saja quai vegnì scrit uschia. Per il Cussegl da pressa na saja quai betg stà pussaivel da valitar sche questas infurmaziuns violeschan il duair da la vardad. La regenza survegn pia raschun en in punct – en l’auter betg. Cun questa decisiun èn tut las dus vart d’accord.
Che la regenza Grischuna fa in recurs encunter ina gasetta na vain betg avant savens – e quai na duess tenor il president da la regenza, Martin Bühler era betg vegnir tar la norma.