L'artist liber Donat Caduff, oriund da Sagogn ha fatg il viadi da Turitg a Cuira per la premiera dal toc «Die Gemeindeversammlung». Envidà spezialmain na saja el betg stà. Curt avant che la tenda dal teater da la citad da Cuira as arva è el plain marveglias tge che spetga. El haja schon spetgas, mo betg en quel senn ch'el spetgia uss ch'i dettia insatge meglier u mender che quai ch'el haja fatg.
Jau sun spannegià en tge variantas ch'ins po elavurar quest material per insatge dramaturgic.
Per el saja il project ensasez stà serrà giu cun la tura da prelecziuns da ses cudesch. Involvà en il svilup dal toc da teater n'è Donat Caduff betg stà – n'avess el era betg vulì esser.
Punct las 19:30 ha la radunanza communala da la vischnanca fictiva «Oberflüeli» cumenzà. In'ura e mez pli tard, suenter discussiuns sur da crema da sulegl, il plaz da minigolf e las uras d'avertura dal recicladi è ella stada a fin. La dumonda la pli ardenta suenter la premiera: Datti insumma parallelas tranter il toc da teater ed il cudisch da Donat Caduff? El di ch'el vesia sin il pli parallelas formalas cun il setting sin tribuna dad ina radunanza communala. Sia impressiun saja ch'ins haja en il fromat dad ina radunanza communala raquintà destins individuals da differents protagonists. Suenter il toc saja sia euforia in zic restrenschida.
Jau hai chattà fitg buna la prestaziun dals acturs, dal chor e da la musica ensemen – sco els han funcziunà sco ensemble. La prestaziun sco tala am para tuttavia fitg impressiunanta.
La via da Turitg a Curia haja rendì. Donat Caduff di ch'el saja stà divertì e n'haja betg stuì guardar sin l'ura durant il toc. Ed el accentuescha ch'el na saja betg in criticher da teater che possia valitar in toc. La bilantscha generala e persunala suenter il toc è dentant moderata. Per el saja stà en urden, di Donat Caduff.
Igl n'è uss betg in toc che jau fiss exnum ì a guardar sche jau avess savì oravant tge che spetga mai.