Dretgira superiura - L'art da Todisco e Zehnder per la Dretgira superiura grischuna

Questa emna pon las dretgiras dal chantun Grischun retrair il nov edifizi da la Dretgira superiura dal Grischun. Il bajetg dal 19avel tschientaner vegn sanà ed engrondì dapi dus onns e mez - quai per bun 30 milliuns francs.

Per quest edifizi han ils dus artists Andrea Todisco e Dominik Zehnder pudì realisar in'ovra d'art integrada en l'edifizi. «Pudair purtar cun l'art in nivel supplementar en in tal bajetg istoric ed impurtant, quai e stà fitg interessant e captivant», di l'artist Dominik Zehnder da Cazas.

Nov plattas che furman in palantschieu che sumeglia sco sch'ins fiss sut ina planta da tigl, il lieu nua ch'i vegniva fatg dretgira da vegl ennà. Sia ovra è plazzada ordadora en ina sort pavigliun che collia il curtin da la dretgira cun la citad.

Trais flums – ina decisiun

La segunda ovra d'art è dal giuven artist Andrea Todisco da Razén. El saja stà surstà, cura che la dumonda d'inoltrar in project saja arrivada tar el. D'ina vart saja quai stà collià cun bler plaschair, dentant era cun ina gronda gnervusitad.

Sia ovra consista da trais relievs da betun ch'èn integrads en las paraids. Els èn ina copia or dal letg da trais flums Grischuns. Tschernì quai haja el cunzunt, perquai ch'el saja sa concentrà per questa lavur sin il mument da la decisiun - la decisiun che possia midar las chaussas en ina, ubain era en ina autra direcziun. Il punct da trais sparta-auas sin il Pass Lunghin, là nua ch'il mument decidia, schebain l'aua va en in flum ubain en l'auter, è ses lieu da partenza.

Il process da creaziun ha pretendì blera precisiun e pazienza. Ils artists han lavurà cun gip e serigrafias per crear lur ovras. La montascha finala en la dretgira è stada accumpagnada da blera tensiun.