En bun in mez onn vegn elegida la regenza grischuna. Quatter da las tschintg persunas candideschan danovamain – pia Martin Bühler, Carmelia Maissen, Marcus Caduff e Peter Peyer.
La gronda dumonda resta tgi che occupa il tschintgavel sez – quel da Jon Domenic Parolini che ha cuntanschì la limitaziun dal temp d’uffizi. Il carussel da candidats e candidatas per quest sez gira adina pli intensiv. Entant èn enconuschentas las suandantas candidaturas:
- Nora Saratz Cazin da la Partida verdliberala
- Aita Zanetti dal Center
- Valérie Favre Accola da la Partida populara
Al di da partida dals socialdemocrats e socialdemocratas la fin da november a Cuira è l’atgna candidatura stada in tema. Enfin uss è cler che Peter Peyer candidescha puspè. Ina segunda candidatura vegn discutada. Per bleras persunas sco era per il presidi è cler – che la segunda persuna stuess esser ina dunna. La PS na possia betg candidar cun dus umens.
Jau chat che nus avain ina buna candidatura cun Peter Peyer. Nus n'avain betg da chattar ina segunda candidatura sin l’ultim mument. Nossa credibladad da la partida patiss.
In’autra opziun fiss da sustegnair ina candidatura d’ina autra partida. Ipoteticamain che la Verda vegniss cun ina persuna pudess la PS sustegnair quella. Quai fetschia dentant part da las discussiuns ch’els stoppian anc far, hai num. Che l’anteriura cussegliera naziunala, Sandra Locher Benguerel, na stat betg a disposiziun, era gia vegnì enconuschent la primavaira passada. Finamira da la PS è da decider davart ina segunda candidatura enfin il favrer.
Peyer vul restar en uffizi – segunda candidatura vegn examinada
Il cusseglier guvernativ da la Partida socialdemocratica Peter Peyer vul vinavant restar en uffizi. E quai vul er sia partida, la PS grischuna. Unanimamain e cun ferm applaus è Peter Peyer vegnì nominà uffizialmain al di da partida da la PS grischuna la primavaira 2025 a Claustra, per las elecziuns da la regenza ch'èn ils 14 da zercladur 2026.
Motivaziun saja clera
El haja ina experientscha da sis onns e cun questa experientscha e l’agid d'in bun team saja el persvadì da pudair prender a mauns las sfidas che stettian ils proxims onns sin l’agenda, uschia Peter Peyer.
Jau ma sent fit e saun e la lavur fa grond plaschair. Perquai ves jau nagin motiv da na betg candidar.
Cler, patratgs da chalar haja er dà, conceda il socialdemocrat. Cunzunt sch'i na giaja betg per la discussiun politica mabain per attatgas persunalas. Cunter questa tendenza negativa lessi el cumbatter.
Segunda candidatura vegn examinada da la partida
Julia Müller, la presidenta da la PS grischuna accentuescha ch’els sajan fitg cuntent cun la lavur da Peter Peyer en la regenza. Els sperian ch’el vegnia er en sia terza perioda a pudair realisar inqual punct da sia agenda politica.
Nus essan pertscherts che la lavur en la regenza munta magari era che la partida è d’in autra opiniun. Quai na munta betg che Peter Peyer na fa betg buna lavur.
Nov program da partida suenter 15 onns
Finalmain è el qua – il nov program da partida. 15 onns haja ussa cuzzà enfin che la versiun finala dal nov program è vegnì preschentà als commembers e las commembras da la partida. Quai saja stà in lung process nua che divers gremis han fatg part. Era anc durant il di da partida a Claustra hai dà discussiuns. Aifer la partida dentant era cun la «sora pitschna», la JUSO. In punct ch'ha dà cumbats saja per exempel la mobilitad. Il giuvens socialdemocrats pretenda in traffic public gratuit per tuttas e tuts. Quai ha il di da la partida approvà. Dentant relativescha Julia Müller, presidenta da la PS grischuna.
Mintgatant dastgan ins era plazzar insatge en il program da partida che n'è betg dal tut realistic. Impurtant è che nus giain en questa direcziun.
Il traffic public è mo ina da 13 parts da las finamiras da quest nov program. Il da partida ha era fixà ulteriuras finamiras sco per exempel, spazi da viver pajabel ubain la capacitad da cumpra. En general stetti il program sut il motto: ina buna vita per tuttas e tuts.