-
Bild 1 von 3. La gruppa dal curs da conversaziun a Scuol. Bildquelle: RTR.
-
Bild 2 von 3. Bildquelle: RTR.
-
Bild 3 von 3. En la classa per principiants e principiantas da puter a Samedan. Bildquelle: RTR.
A Samedan vegn dapi 50 onns instruì l'idom puter per interessadas ed interessads. Organisadas vegnan questas emnas da lingua da la fundaziun de Planta.
Per passa 80 participants e participantas vegnan purschids durant duas emnas da stad differents curs. Per exempel curs per principiantas, ma era curs per avanzads a Samedan. Era d’atun datti in curs da rumantsch, quel è però a Segl.
Quest onn cruscha la segunda emna dal curs puter cun quel dal vallader a Scuol, nua che la Lia Rumantscha organisescha in curs intensiv per l’Uniun dals Grischs. Per quel èn passa 150 persunas s’inscrittas per emprender durant in'emna intensivamain rumantsch.
Sfida en Engiadin’Ota sco era en Engiadina Bassa
La pli gronda sfida per quellas e quels da buna veglia d’emprender il rumantsch è, che las baterladas en il mintgadi mancan.
Igl è grev d'exercitar quai ch'ins emprenda. Jau sun da Berna, e là è quai difficil da chattar insatgi per far ina baterlada en rumantsch.
Ma era, sch'ils participants e las participantas èn en Engiadin’Ota, n’è quai betg simpel da chattar partenarias e partenaris sin via per exercitar. La glieud, midia savens da rumantsch en tudestg, sch'i badan, ch'insatgi na discurra betg uschè bain rumantsch.
Per Chasper Stuppan, ch'è magister pensiunà e dat lecziuns en puter, vallader e jauer, èn las sfidas per emprender puter pli grondas che quellas d'emprender vallader.
En vallader vegn quai scrit sco ch’ins discurra. Per emprender è quai pli simpel ch'il puter ed il jauer, ch'ins scriva auter che la lingua discurrida.
En sias numerusas lecziuns, a Samedan ma era a Scuol, ha Chasper Stuppan badà, che ses scolars e sias scolaras cumbattan cun sfidas sumegliantas. Sin via na vegnia betg pli discurrì uschè bler rumantsch. Pli baud saja quai stà normal, ch’ins haja salidà per rumantsch e lura dà ina baterlada. El auda ozendi dapli il salid «Grüezi», ed uschia saja quai pli grev da baterlar sin via.
Tuttina far enavant
Il magister però fa però era vinavant part dals curs da vallader, puter e jauer. L’interess e la motivaziun da ses scolars e sias scolaras als curs intensivs da rumantsch è grond. E perquai saja per el impurtant da pussibilitar ils curs er en l'avegnir.