Cun 43 onns è Flurina Eichholzer da Zernez en la furma da sia vita. Avant in per onns ha ella cumenzà cun il sport da currer sur munt e val, ha absolvì emprimas cursas regiunalas e stat uss davant ina grond’aventura. Numnadamain spetga il campiunadi europeic en la Slovenia.
Il currer è per mai pura libertad! Jau ma sent sco ina regina!
Dal passlung en il sport da currer
Flurina Eichholzer è creschida si en ina famiglia sportiva en Val Müstair. Ensemen cun ses geniturs e las duas soras, ha ella fatg bleras turas da skis u gitas ed ha gia baud mess sin la carta passlung.
Quai eran forsa trais, quatter famiglias en Val Müstair che han cumenzà cun il passlung. Nus eran ils exots, il passlung n’era betg uschè popular sco ozendi.
Ella è rivada fin en il cader B da passlung, causa la malsogna da Pfeiffer è ella però vegnida sfurzada da sa retrair dal sport da prestaziun. Cura che ses uffants eran pli gronds e Flurina Eichholzer aveva puspè dapli temp per sasezza, ha ella chattà en il sport da currer e cumenzà da trenar puspè pli fitg.
Ils resultats da las cursas regiunalas han dà en egl al trenader da la squadra naziunala Svizra. Quel ha contactà a Flurina Eichholzer ed ella è sa qualifitgada ensemen cun trais autras atletas svizras pel campiunadi europeic en la Slovenia.
La finamira è il plaschair
Quell’occurrenza duai esser en emprima lingia in’experientscha che fa plaschair. La finamira persunala è da dar tut e da giudair las cursas.
Esser ina part fixa da la squadra naziunala, quai na vegn per Flurina Eichholzer per il mument betg en dumonda. Sisum stettia numnadamain sia famiglia ed uschia curria ella era senza grondas ambiziuns.