Mez milliun meters cubics - Gronda bova da crappa è vegnida giu en la Val Zuort

Entadim la Val Zuort en l'Engiadina Bassa è ina bova da crappa sbalunada dumengia saira. Ils responsabels da la vischnanca da Scuol quintan che in mez milliun meters cubics crappa è crudada. Questa saja sa distatgada tranter il Piz Pisoc ed il Piz Zuort, crudada sin il glatscher e betg glischnada vinavant. Quai ha confermà la vischnanca da Scuol ad RTR suenter in'emprima examinaziun cun il helicopter e cun in spezialist da privel dal chantun.

Tenor la vischnanca na datti nagin privel per persunas – era sch'ins stoppia quintar cun ulteriuras bovas secundaras. Questas sajan lura però bler pli pitschnas. La vischnanca da Scuol quinta cun ulteriurs 50'000 meters cubics che pon anc vegnir a val. Actualmain èn las sendas da viandar en la Val Zuort anc avertas – la vischnanca recumonda però da betg ir en quella zona.