Sch'ins va en vacanzas en l'exteriur vegn ins tut tenor destinaziun avisà da betg bittar palpiri en tualetta, perquai ch'ins pudess stuppar las sereneras. En Svizra n'enconusch'ins per fortuna betg talas instrucziuns sanitaras, e la gronda part da la populaziun bitta palpiri da tualetta da tut gener en l'aua. Ma ils models umids, sco er palpiris cosmetics u sumegliants, na tutgan atgnamain betg en tualetta.
Uschia ha il palpiri da tualetta umid adina puspè chaschunà disturbis u interrupziuns en il sistem da l'aua persa a Segl. Perquai aveva la vischnanca er infurmà ed avertì la populaziun da betg bittar en tualetta faziels umids sco era palpiri da cosmetica u products sumegliants.
Blers implants da pumpar
«Ils faziels umids èn bler pli robusts ch'il normal palpiri da tualetta, perquai ch'el consista da fibras stabilas. Cun tals products na vegnan las pumpas betg a frida che fissan normalmain ablas dad allontanar u da tagliar palpiri convenziunal», declera Nutal Trombetta, il chau-funtauna da Segl.
Cun tals products na vegnan las pumpas betg a frida.
El agiunta ch'i dettia ina situaziun particulara a Segl, damai che la vischnanca sa chattia en ina planira. Perquai datti differents implants da pumpar per garantir che l'aua persa arrivia da las chasadas fin en la serenera da Segl. Perquai ch'ils chanals èn era construidas cun in diameter pli pitschen per garantir ina pressiun pli gronda pervia da la pitschna pendenza, datti adina puspè incaps tar quests implants da pumpar. Ultra da quai pon ils chanals vegnir stuppads, uschia ch'ils lavurants ston adina puspè deliberar ils chanals e las pumpas dal palpiri da tualetta umid.
Tractament final per a Silvaplauna
Entant ch'i dat trais sereneras pli pitschnas en la Val Fex, sa chatta a la fin da la vischnanca, directamain a la riva dal Lai da Silvaplauna, ina serenera per aua persa da Segl, nua ch'igl ha lieu mo pass da tractament. La serenera da Segl consista d'in rastè, d'in batschigl da sablun e d'in isolader da grass. «Il rest da l'aua persa da Segl vegn lura transportada en ina chanalisaziun tras il Lai da Silvaplauna e lura tar la serenera da Silvaplauna, nua ch'ils ulteriurs pass da tractament han lieu», di Nutal Trombetta.
Chavels èn plitost il problem a Silvaplauna
Co vesi ora cun las duas autras sereneras da l'Engiadin'Ota? Han ellas in problem sumegliant – u na vegn mo il sistem d'aua persa a Segl betg a frida cun il palpiri da tualetta umid?
Eduard Nu, il manader da la serenera a Silvaplauna ha confermà sin dumonda da la FMR ch'els n'hajan nagins problems en quest reguard. El di: «Igl è cler che products sco faziels umids na tutgan betg propi en l'aua persa, ma la glieud bitta tuttina anen. Ma perquai na ston nossas pumpas mai star airi.»
Eduard Nu agiunta che quai saja era d'attribuir al fatg che la serenera a Silvaplauna ha pli grondas pumpas che la serenera a Segl. L'unic che chaschuna tenor el gronds disturbis èn ils chavels che furmian chanels enturn las pumpas.
Lungas tarscholas
A S-chanf, la pli gronda serenera da l'Engiadin'Ota che nettegia l'aua da San Murezzan fin S-chanf, è il problem dal palpiri da tualetta umid era in problem, sco che Godi Blaser, il manader da l'implant, di: «Quest problem avain nus er, mintgatant èn lungas tarscholas da quest palpiri da tualetta umid che blocheschan lura er qua las pumpas.» Ed el agiunta che la lavur da nettegiar ils indrizs da quest material saja magari stentusa ed insumma betg agreabla.
Mangiativas, cartas da credit e telefonins na tutgan betg en tualetta.
Ma tenor Godi Blaser è la serenera a S-chanf concepida uschia, ch'i na dettia betg interrupziuns pli grondas pervi dals faziels umids e lavurs da nettegiar. Ma el avertescha danovamain: «Mangiativas, cartas da credit e telefonins na tutgan betg en tualetta. Tut quai avain nus gia chattà – e mo palpiri da tualetta normal tutga en tualetta.»