Avant circa in onn e mez ha il Centro Medico amez la vischnanca da Puschlav avert sias portas. Trais medis da chasa èn s'unids en ina pratica communabla, per crear ina moda da gestir la medicina da basa e da famiglia.
Ina soluziun per sfidas en la periferia
Per Christian Raselli è la pli gronda sfida dal provediment da sanadad en valladas perifericas, da chattar docters u doctoressas da chasa. Cun il Centro Medico a Poschiavo, fabritgà nov gist sper l'ospital San Sisto, dess la pratica communabla porscher ina plazza da lavur variabla. Cun questa pratica duai sa diminuir la lavur d’administraziun, ma era porscher uras da lavur flexiblas per esser attractiv per futurs medis da chasa.
Collavurar e nizzegiar tut las resursas disponiblas
La proximitad da l’ospital San Sisto, la Spitex e la chasa d’attempads è in ulteriur avantatg, perquai ch'ella permetta d'utilisar optimalmain las resursas existentas sco la radiologia, il laboratori e la gestiun dal servetsch d'urgenza, ch'ils medis e las medias dal Centro Medico han l’incumbensa da gestiunar medicinalmain. Quai promova la collavuraziun tranter ils medis da chasa e spezialists.
Quest model da collavuraziun è ideal per il provediment da sanadad en valladas perifericas sco la Valposchiavo.
Acceptanza da la populaziun
La glieud ha gì al prim resalvas e forsa era in tic tema pervi dals midaments en il provediment da sanadad. Dentant ha ella sa disada, che tut il servetschs medicinals da basa e da famiglia sa chattan en la medema plazza a Poschiavo, di Christian Raselli.