Ils 28 da settember ha il suveran da San Murezzan da decider sch’i duai dar in nov model da direcziun. La suprastanza communala propona in model da CEO. Uschia duain vegnir separads cleramain ils champs strategics ed operativs e la vischnanca vegniss manada sco ina fatschenta privata.
Daventar pli effizient
Tenor Christian Jott Jenny, il president communal da San Murezzan, pudessan il president e la suprastanza sa concentrar cleramain sin las lezias strategicas e politicas entant ch’il directur sa fatschentass cun las dumondas operativas dal mintgadi. La gronda differenza dal model da direcziun en congual cun il model dad oz, cun in chanzlist, saja il process da decisiuns. Il CEO survegniss cumpetenzas da decider davart decisiuns impurtantas ed era da dar ora fin 100’000 francs l’onn.
Populaziun è sceptica
Ad ina sairada d’infurmaziun ha la vischnanca preschentà il model. Per la populaziun para quel d’esser magari cumplex, els teman ina distanza memia gronda tar la chanzlia ed era ch’il CEO pudess survegnir ina memia gronda pussanza.
Reducir parlament
Ina segunda dumonda che la suprastanza communala da San Murezzan suttametta a la populaziun è da reducir il dumber da cussegliers communals da 17 sin mo pli 11. Quai or dal motiv ch’i vegnia adina pli difficil da chattar avunda persunas che sa mettan a disposiziun per surpigliar in tal uffizi.
