Poetry slam è ina concurrenza litterara. Ils participants e las participantas preschentan lur texts scrits sezs, ed il public valitescha lura quels. Per l’emprima giada datti quest onn er in campiunadi svizzer. Durant il 1. Swiss Poetry Slam Championship a Bienna cumbattan poetessas e poets da las quatter regiuns linguisticas per il titel.
A prima vista n’ha l’electrotecnica betg da far bler cun scriver. Dentant sent’ins tar mes texts ch’els han in tschert ritmus ed ina structura. Per gronda part va er tut en rima.
Selina Poo da Sent vegn a represchentar la Rumantschia. La dunna da 20 onns è sa qualifitgada cun ina victoria al Festivalet a Turitg per la concurrenza a Bienna. En sasez na sa cunfa il scriver texts cun sia professiun, admetta la dunna che studegia dapi dus onns electrotecnica. Tuttina ha ella chattà in’atgna maniera da structurar ses texts. Qua in'emprova dal stil da slammar da Selina Poo:
Ils temas per ses texts chatta Selina Poo durant inscunters e discurs en ses mintgadi. Tut tenor èn quai er texts politics u critics. Quai saja il bel vi dal poetry slam, ch’i na dat nagins cunfins.
En vista a sia performanza sin il palc a Bienna ils 7 d’avust 2025 è Selina Poo entant vi d'exercitar la pronunzia, il ductus ed er la mimica per intgantar la schuria ed il public. Per che quels chapeschian er il cuntegn, èn ils texts rumantschs vegnids translatads. En tut van en cursa sis finalists e finalistas or da las quatter regiuns linguisticas – e cumbattan per il titel da campiun u campiunessa da poetry slam svizzer.