A San Murezzan duain tut las interpresas sa participar al program da far tests da corona dal chantun. La suprastanza communala fa perquai in appel. Custs che na vegnian betg cuverts dal chantun u la Confederaziun, surpiglia la vischnanca, hai num en la communicaziun. Er la vischnanca sezza cun radund 300 collavuraturas e collavuraturs sa participescha als tests.
Tests regulars sajan numnadamain il meglier med per franar la derasaziun dal virus ed uschia d'impedir ulteriurs lockdowns, argumentescha la vischnanca. Cun questa mesira veglia San Murezzan augmentar la segirtad da giasts, collavuraturs ed indigens en vista a las vacanzas da sport. La vischnanca da San Murezzan ha gia duas giadas testà l'entira populaziun.