La bilantscha definitiva da la stagiun d’enviern vegn anc fatga. La uniun tetgala Pendicularas Grischunas spetga anc ils resultats dals dis da Pasca - lura vegn fatg bilantscha. Tuttina è il president Markus Moser optimistic per la finiziun da la stagiun d'enviern en il Grischun.
Tge ch'è dentant gia avant cler: Tranter ils differents territoris da skis datti grondas differenzas. In sguard sin quatter territoris da skis.
Scuol: Cuntent, malgrà sfidas
En la Engiadina Bassa en ils responsabels cuntents cun la stagiun. Andri Poo, directur da las pendicularas Scuol-Motta Naluns, ha declerà che la stagiun da skis è stada sin in nivel sumegliant sco l’onn passà. Malgrà la mancanza da naiv al cumenzament sajan las cundiziuns sin las pistas stadas tant enavant bunas.
La stagiun da skis a Scuol cuzza anc fin in’emna suenter Pasca. Las relaziuns sajan uss bunas, di Andri Poo rient.
Igl è bunamain tipic per ils ultims pèr onns: Las relaziuns èn durant la primavaira bunamain las meglras – dentant è il desideri d'ir anc culs skis lura er plaunet passà.
Ins speria perquai natiralmain anc sin intgins ferms dis finals – er sch'ins avess gì las bunas cundiziuns pli gugent gia pli baud.
Andermatt-Sedrun: Ina stagiun fantastica
En la regiun Andermatt-Sedrun è la bilantscha fitg positiva. Thomas Christen, directur da turissem da Andermatt, ha resumà la stagiun sco «fantastica». Cletg da aura e cletg da naiv han procurà per in fitg bun sentiment tar ils turistichers en la regiun da Andermatt-Sedrun.
Mustér: Ina stagiun difficila
Pauc davent da la stagiun «fantastica» a Sedrun, datti in auter maletg. A Mustér saja la situaziun nuncuntentaivla. Il directur da las pendicularas, Stefan Arnold, ha confermà che la mancanza da naiv al cumenzament da la stagiun ha chaschunà sfidas considerablas. Cura che la naiv saja finalmain arrivada, hajan las cundiziuns meteorologicas fatg naufragi. Uss, cun la taimpra da primavaira, saja il giavisch dad ir sin pista pli pitschen. A Mustér spetgan ins sin buns dis da Pasca per avair almain ina buna finiziun da la stagiun.
Bivio: In maletg ambivalent
A Bivio, al pe dal Pass dal Gelgia, èn las impressiuns da quest enviern ambivalentas. Gregor Vellacher, mainafatschenta da las pendicularas Bivio, ha resumà la stagiun cun impressiuns maschadadas. Bunas frequenzas durant Bumaun, pli pauc che spetgà il favrer, pauca naiv ed ina nauscha spartiziun da las vacanzas. Uschia hai dà per part pli pauca glieud sin las pistas da skis a Bivio.