Il matg passà ha il center da transit a Marmorera avert sias portas. Actualmain vivan 67 persunas cun 15 differentas naziunalitads en l'anteriura chasa da champs da vacanzas Scalotta ed oriunda chasa da scola a Marmorera.
I na dovra betg bler
Per vegnir en contact na dovri betg bler, di Bettina Kiefer da la Crusch Cotschna Grischun. Ella ha dà in'invista en las activitads ch'ella organisescha en dus centers da transit dal Grischun cun sustegn da voluntaris e voluntarias. Simplamain baiver in café u té ensemen, dar in gieu sco per exempel «UNO» – quai giaja er senza ch'ins discurri il medem lungatg. Ils inscunters sajan per tuttas duas varts fitg cuntentaivels.
Visita a Marmorera
Avant Nadal ha ina pitschna gruppa dal Surses fatg ina visita en il center da Transit. Ensemen cun ils abitants e las abitantas han els ed ellas mangià mandarinas, spagnolettas, petta e zambregià stailas per decorar las fanestras. l saja stà ina fitg bella experientscha, di ina participanta. Er Adrian Ballat, suprastant dal cumin da Surses e responsabel per il departament social di che la visita a Marmorera saja stada fitg custaivla per el. Ins haja sentì che l'interess saja qua ed il barat cun ils abitants saja stà fitg interessant.
La visita a Marmorera m'ha motivà da m'engaschar per la lavur voluntaria cun e per ils fugitivs.
Er il president da la plaiv evangelica refurmada Beiva – Surses, Helmut Andres conferma ch'il interess saja stà grond e che la visita haja fatg grond plaschair a tuttas duas varts.
Ils abitants han engrazià fitg per la visita. L’engraziament han els immediatamain collià cun il giavisch che nus duain puspè vegnir.
Suenter la saira è il tenor dals organisaturs unisono: Ins saia cuntent cun la ventgina persuna ch'è rendida quella saira en la sala Grava pitschna a Savognin. E l'interess sa mussa er sin la gliesta da contact per voluntaris e voluntarias; quella era la fin da la saira bain emplenida cun nums e datas da contact.
L'entschatta è gartegiada.
La pli gronda sfida saja da chattar persunas che surpiglian la coordinaziun. Adrian Balatt e Thomas Widmer, il plevon èn sa miss a disposiziun da sa participar a la gruppa da coordinaziun. Il proxim inscunter vegn ad avair lieu il mars. La finamira saja da chattar 3-4 persunas che surpiglian la coordinaziun.