Il plan da destinaziun dal Surses ha ina gruppa da lavur elavurà tranter october 2025 e favrer 2026. Quest plan definescha finamiras communablas per la regiun, senza ch’ils singuls acturs sajan però liads strategicamain. Tuttas organisaziuns ed instituziuns èn vinavant responsablas per lur fatschentas e projects. «Il plan da destinaziun è dentant impurtant per che tuts sappian, en tge direcziun che nus vulain ir», ha il president communal da Surses Daniel Wasescha accentuà envers la FMR.
Per la coordinaziun è però l’uschenumnada conferenza da destinaziun Val Surses (tud. «Destinationskonferenz Val Surses») responsabla.
Ina rolla impurtanta ha dentant la vischnanca da Surses. Sco che Daniel Wasescha ha ditg en il discurs cun la FMR, na possia la vischnanca persula dentant betg promover il svilup positiv.
FMR: Pertge dovra il Surses uss in plan da destinaziun?
Daniel Wasescha: I dovra quest plan per vesair il maletg grond e per il svilup general da l’entira destinaziun. Perquai èn ils differents acturs sesids ensemen ed han rimnà tut ils plans e projects en in document. Ma i n’è uss betg gist in termin decisiv.
I n'è pia betg in plan da salvament per il Surses? Gist quai che pertutga ils letgs chauds sa chatta la destinaziun gea en ina crisa.
Na, tenor mai betg. Igl è il resultat per l’ina da l’analisa dal passà e da la situaziun actuala e per l’autra èsi in sguard en l’avegnir.
Ina rolla centrala vegn en quel reguard la conferenza da destinaziun ad avair. Tge fa quella propi e tge cumpetenzas ha ella?
Questa conferenza guarda ch’il plan da destinaziun vegnia realisà e che las differentas organisaziuns lavurian vinavant ensemen. Cumpetenzas concretas n’ha ella dentant betg. Ella ha la rolla da coordinar projects ed investiziuns dals differents partenaris.
La vischnanca ha incumbensà il plan ed ha era il presidi da la conferenza. Vegn ella damai er ad investir dapli en il turissem, per exempel sco en l'hotel Cube?
Na, i na dat nagin connex direct tranter il presidi da la conferenza ed ils projects u las investiziuns. Cler è però che la vischnanca ha ina rolla fitg impurtanta per sviluppar la destinaziun e ch’ella investescha era fitg blers raps. Ma ulteriuras investiziuns dal maun public en la hotellaria n’èn betg planisadas. Quai n’è betg la rolla da la vischnanca e la vischnanca suletta na po betg influenzar bler. I dovra la collavuraziun da tut ils acturs turistics ed ins sto vesair il plan da destinaziun sco schanza.
Tuttina la dumonda: Tgenin u tgenins projects dal plan da destinaziun èn tenor Vus sco president communal spezialmain impurtants per l'avegnir?
I dependa schon bler dals letgs chauds. Nus vulain puspè cuntanscher cifras sco avant 15–20 onns. Perquai è segir il project Viols cun il resort ed l'hotel impurtants. Quels èn gia planisads dapi plirs onns. L’albiert da giuventetgna en l'hotel Cube ed auters hotels vegnan medemamain a promover quest svilup. Il segund tema impurtant è la garanzia da naiv l’enviern. Quai vegn franc a custar ina bella summa, ma igl è essenzial per l’avegnir.
